Ralkap Uknak Lakmi Duhlonak Langhter In Darkheng A Tum Tu Thantlang Khuasa Salai Sang Ling Mang Police Nih An Thlah Cang
Salai David Van| TCP-Hakha| 2021 Febuary 5| Chinram kulh Thantlang ah ralkap uknak lakmi duhlonak langhter in Darkheng a tum tu Salai Sang Ling Mang cu Thantlang Police nih ceihhmainak ngei dingin Police Sakhan an kalpi tlawmpal ah an thlah than tiah theih a si.
Hi kong he pehtlai in Salai Sang Ling Mang nih “Police nih zeipi an ka timi a um lo. Tlerhkhawnhnak le sualphawtnak zong a um lo. Nizaan kan buaibainak kong bia an ka hal i min an ka thutter. Cun tuzaan zong Darkheng ka tum thiamthiam ko lai ka ti hna na huam le va tum ko an ka ti i an ka lawiter colh ko. Cun biacah kan duhmi hna cu hibantuk ralkap nih uknak an lakmi kongah hin lungrual te le dai tein doh hna usih. Cutilo ahcun a luancia tuanbia ah kan kir than sual lai tiah” TCP ah a chim.
Salai Sang Ling Mang hi nizaan ralkap uknak lakmi duhlonak langhter in Darkheng kan tum lio ah Poilce pawl nih an kalhnawh hna i bia el nak tete a um caah tuzing ah Police nih an ka kawl i sakhan ah i ceihmai ding a um tiah an ka kalpi nak hi a si.
Tuni Police Sakhan kalnak ah TYA hruaitu telhin Thantlang Mino, TSC tiin minung 60 hrawng nih an zulh tiah theih a si.
Tubantuk in ralkap uknak lakmi duhlonak langhter in Darkheng a tum tu Pu Ci Ling zong Feb 4 zaan khan Hakha ah an tlaih ve i Hakha Sakhan ah an chiah rih ko tiah theih a si.