Thawldawi An Tonmi Kong Ah Hakha Khuanu Khuapa Nih President Sin Ah Catial An Timh

 Salai Cung Cung|2019 February 28| February 21, Hakha Town Hall i tuahmi tonpumhnak ah Hakha khuanu khuapa tonpumhnak chung an luh hnu ah an thawl hna nak kong he pehtlai in March thla chung ah thil phunhnih in Myanmar ram president sin ah cakuat an timh.

“Hi tonpumhnak ah sawmnak ca an kan pek caah kan va kaimi a si. Hakha khuanu khuapa ai-awh in keimah, Pu Ngun Sang Aung, Pu Thla Kio Lian, le Pu Chum Ling kan va kal. Tonpumhnak chung kan luh hnu ah nan i tel lo, cozah zung riantuantu lawng ton ding ah auhmi an si tiin a leng ah an kan chuah. Zeiruang ah sawmnak ca pek komi nan kan thawl kan ti i mithmai chiat bu in kan tin than ve. Hi President nih tonnak a tuahmi ah hin ramkulh cozah  nih rian an tuan lonak kong le kum saupi ti kan harnak kong chim kan timh. Nain khuanu khuapa nih mual a kan phoh sual lai ti an phan caah maw si hnga? Khuanu khuapa an kan thawldawimi cung ah kan lung a fak tuk i February 26 ah tonpumhnak kan tuah. Kanmah EC vialte le CYO, CWO kan i ton hna i lamzawh rih lo in President sin ca kan tial hmasa lai i a tlamtlin lo ah cun a herh ning in duhlonak lam kan zawh lai tiah biachahnak kan tuah. Cun meeting chung in a kan thawlnak kong hi vawileicung media zapi theih in thawngthanh ding tiin tu hi ca kan tial lio pi a si” tiah Hakha khuanu khuapa Pu Hrang Vung nih The Chinland Post ah a chim.

“Khuanu khaupa hi zeibantuk bawi an rak tlun zong ah sawm le a kai pengmi kan si. Tutan Myanmar president a rak tlun lio tonpumhnak ah khuanu khaupa nan i tel kho lo a kan ti cu lungfak ko. Zei ruang ah dah a si, hoi ruahnak dah si? Chin ramkulh cozah ruahnak maw si, asilole hi bantuk ruahnak he dah Myanmar ram president hi a rak tlun timi theih kan duh.  Cucaah ca tial kan i timhmi a si. Daw Aung San Suu Kyi a rak tlun lio ah mizapi he tonnak a tuah, zei caah dah President a rak tlun lio ah khuanu khuapa he ton a ngah lonak a ruang hi theih kan duh, aho te ruahnak a si” tiah Pu Ral Kham nih The Chinland Post ah a chim.

“Myanmar ram president sin ca tial ding kan i timhmi cu a pakhatnak ah zei ruang dah tonpumhnak in an kan thawl? Pahnihnak ah zeiruang ah Hakha pumpi tu tiang dinti hmu kho lo in kan um peng rih, timi hi an si. Abik in ti kong hi a si, Chin ramkulh cozah nih ti kong an tawlrel ning vialte kan khawmh dih lai i ramkomh president sin ca kan tial lai. Tu hi ca pawl kan timh tuah lio a si, March thla chung ah cun a chuak kho ko lai” tiah Pu Hrang Vung nih a chim chap.

President U Win Myint tutan Hakha rak tlunnak a ruang bik cu akum 71nak Chin Miphun Ni hman ah a si. A nupi le ramkomh minister cheukhat nih an rak zulh khawh. President a tuan hnu in a hmasabik Chinram a rak tlawn a si. Hakha in a kir lei ah Surbung tlang vantlawng tual zong a zoh tiah kan theih.

Na ruahning rak langhter ve.. (Leave a comment)

%d bloggers like this: