The Voice Myanmar Ah Nicholas Pasangma Semi Final A Kai Cang

The Chinland Post| 2019 May 27| The Voice Myanmar Season 2 i Live Show hlasak zuamnak an tuah cuahmah liomi ah Laipa Nicholas Pasangma @Dawt Kam Sang cu semi final a kai i June 9 ah aa zuam than lai.

Zahan zan zuamnak ah Team Ni Ni le Team KP in minung 8 an i zuam. Atu tan Live Show zarh khatnak ahhin minung 4 an tla i, minung 4 an kai. Laipa Nicholas Pasangma@Dawt Kam Sang cu Team Ni Ni in SMS vote tambik a hmuh ruangah atu bantuk in Semi final a kai hi a si. Team Ni Ni in Hazel cu coach Ni Ni Khin Zaw nih a thim.

Team KP in Novem Htoo le Nyo Mie Mie Htun an kai ve.  Nicholas Pasangma cu ‘A Star Is Born’ movie hla ‘Shallow’ in aa zuam. Hika ah zuamnak i a sakmi video in zoh khawh a si.

 

Hmai zarh, June 2 ah a tang rihmi Team RZN le Team YC in minung 8 an i zuam lai i minung 4 lawng an tang ve te lai.

Semi final cu June 9 ahkhin a si lai i a tangmi minung 8 kha pakhat cio in an i zuam lai. Team 1 cio ah mipi vote tlawmbik a hmutu minung 1 cio an tla lai i a thiam bik 4 lawng an tang cang lai.

A thiam bikmi pali a donghnak bik zuamnak (Grand Final) cu June 16 ah an i zuam lai. Cu tikah  The Voice Myanmar Season 2 Winner cu a fiang te lai. The Voice Myanmar Season 2 winner laksawng cu kyat sing 200, Ford motor 1 le Universal music in album 1 chuahpiak a si lai.

The Voice Myanmar Live zuamnak cu MRTV le The Voice Myanmar Facebook Page in zaan suimilam 9 (Myanmar caan) ah zoh khawh a si lai.

Nicholas Pasangma @Dawt Kam Sang hi Senthang peng Dongva khuami Pu Hrang Vung le Pi Thluai Iang @Thote nih an ngeihmi an fapa a si. Amah hi  Eain Mat Sone Ya hlasak zuamnak ah top 3 ah a rak i tel balmi a si.

Na ruahning rak langhter ve.. (Leave a comment)

%d bloggers like this: