Theih A Herhmi- HCMF le Ralkap SAC Ton Biaruahnak

Hakha Christian Ministers’ Fellowship (HCMF) le Ralkap State Administrative Council (SAC) Tonbiaruahnak

Caan: 1:00 PM

Ni: 28 Feb 2021

Hmun: HBA Hall

Ralkap SAC lei nih biapi chimmi:

“Ralkap in palai SAC lei nih cun nannmah [Pastor te] nih tuanvo la [cang] hna u, nan fale cawnpiak hna u, cunglei in nawlpekmi tampi a ra cang. Leng chuah in lam zawh ti hna hlah seh! Hmun dang bang hmalak a herh sual cun, thil dawh lo le nuam lo a chuak kho…” timi hi anmah lei biapi an chim a si.

Pastor te biapi chimmi:

Nan fale hi control hna u nan timi hi kan tuah Khawh lai, Kan tuah lai tiah Kan in Kam kho hna lo. Cun, Kanmah Nih Kan fial mi hna an si lo. Minung an i thek dih hnu ah, tlai hna Hlah u. Civil servant pawl zong zaan ah va leng in va tong hna hlah u. Cucu, tlerh Khawnh a si caah Kan Duh lo. Kap hnih in non-violence a si ding Kan Duh.

Hakha Christian Minister’s Fellowship (HCMF) lei in bialehnak an tuah mi chung in, a biapi deuh mi le an chimmi chung in kan lak khawh tawk mizpi sin ah kan hun in hromh hna. [Hihi Official Record a si lo, Meting chung le zapi sin ah biachim nak an ngeih mi chung in a tawinak in hun tial mi a si]

HCMF lei in biachimtu upa an i thiah mi chung in minung pathum nih a tanglei bantukin an chim;

Rev. Za Khar

Kan fale an hmailei (future) a rawk bantuk a si caah kanmah lawng silo in, nanmah zong nan theihthiam hna a hau. Ngakchia cu mah inn hmanh ah meh kong ah nuar hmanng mi a si. Cucaah, kan hmailei a rawk tiah an i ruah mi chung in an duhnak an langhter mi, an un mi a si caah nanmah lila nih nan theihthiam hna ding biapi.
Nihin thil a cang mi hi, HCMF nih kan fial hna lo. Kan tuahter hna lo. Anmah lungtho tein duhnak an langhter mi a si. Kan fale kan chim kho hna lai lo. Cucaah, rak cawnpiak hna u nan timi hi nanmah lei cun a si ve ko, nain kan chim kho hna lai ka zum lo. Nanmah zong nih nan fale nan chim kho hna lai ka zum lo. A cunglei nih an in fial hna ruang ah nan tuah mi a si tiah kan ruah ko. Cucaah, kan theithiam ko u, nai zong ah UN ah Palai thlah mi nih a biachim ning kha nan theih dih mi a si. Zapi lei in a tan kha nan theih dih mi a si ko.
Atutan thil a cang mi hi, Hakha sinak lawng in nan zoh lo ding le Ramkomh ning in kan zoh piak u. Cun, [nizaan a cang mi kong ah] kan Biakinn Hmun [HBA Compound] hi, a hlan [kum 100 a rau cang mi ah] Ram ngeitu sin in Khrihfa nih kan hal mi, man khiah mi tein pek in ngah mi a si. Hopoah caah Kan on mi a si ko. Nain, nan kan upat piak ding ka duh.
Nan kan ton caah kan i lawm ko, nain tuanvo kan in Pek hna tiah nan ruah lo ding a biapi. Nan theihthiam ding biapi. Remdai tein lamzawh hi cu nan theihthiam ding caah biapi ngaingai.

Rev. Dr. Henry Siang Kung

Remdai le buaibainak um lo (Non-violence) tein cawlcangh hi kan duh. Kan fale nih zeitluk an in Nam hna zong ah, theihthiam ko hna u.
Tulio an tuah mi lamzawh in duhnak langhter an tuah mi kongkau ah, biaruahnak in an zawh caan tbk. “a caan tawiter, silo ah lam dang deuh kawlnak” in biaruah ah a tha.
Atutan cawlcang nak hi Biaknak he a pehtlai bak lo mi a si tihi nan theihfian ding ah kan duh. Khrihfa kan zumhnak phung ah Uknak (Ngan-ngan-zi) le Khrihfabu (Church & State) hi a then bak mi a si.
Cun, [nizaan bantuk tlaih khih mi kong ah] mi vialte an kal dih hnu, a cikpak in an i then dih hnu ah, Ralkap nih thazaang hmang in tlaih, Mibu an i thek hnu i Pakhat-hnih a tang mi tlaih tbk. cu a tha lo. Kan duh lo. Cucaah, hi hnu hmailei zong ah nan tuah tilo ding kan duh.

Rev. Ngun Thawng Mang:

Remdaihnak kan duh bang in, Dinfelnak le Dingthluk Lairelnak (Justice) zong a duh mi dan si. Kan dirpi mi zong a si. Kan dirhmun cu Justice kan dirpi mi hi a si. Cucaah, mizapi nih nawlhalnak le fialnak ruang ah, hriamtlaih phu hnih karlak ah tlangtlatu sinak dirhmun kan rak lak i, kum 1996 thawk in CNF/A le Ralkap karlak ah cawlcang mi zong hi Pastor te kan rak si. Cucu, remdaihnak (peace) kan duhnak le dingthluk lairel (justice) kan duhnak ruang ah, Pastor te hi rak kan hruai u an ti caah kan rak dir. Nihin ni tiang a kal i NCA minthutnak tiang kan rak kalpi hna. Nain a tu tiang cu a dai lo. Remdiahnak kan duh ruang ah a rak dirmi [kan] a si.
Zalong tein chimrelnak nawl, khuahruah nak nawl [le ruahnak i dannak nawl] kan ngei dih. Hramhram in umnak nakin Zawnruahnak (Metta) hi mi nih kan duh deuh. Hramhram in tuahto nakin tha tein biaruah kan duh. Cucu, a tha mi a si i dawtnak in tawlrel a tha. Nain, zeitindah kan kalpi lai? Kan fale kong ah zeitindah kan tuah lai timi cu fak deuh in kan ciah, kan khaan le kan ruah deuh a hau.
Cun, remdaih le buaibai lo (Non-violence) in a kalmi, Lamzawhnak a tuahmi mino, mipi hi lehrulhnak ah ahodah hramhram lehrulhnak (violence) a hmang hmasa. Ahodah Titoih, Gas, Meithal tbk… a hmang hmasa timi hi a biapi ngai. Cucaah, fak deuh pi in kan ruah, nan ruah a hau.
A dang pakhat cu a luan cia mi thla ni 10 (Feb. 10) ah CPTC min in ca kan rak tial. Cucu, nanmah uktu upa le remdaihnak caah riantuan mi phu (CPTC) Karlak ah tonnak ngeih ding mi kong a si. A hlei in, Hakha hrambunh Buihahmu (Tactical Command, Hakha), Ye-Min-kyi, Htwe-oh Minkyi tbk…. nan sinah kan rak hal, nan kan tong duh lo. Cu nih cun, khua a kan ruahter ngai. Biaruahnak (negotiation) ngeih an duh lo maw timi hi kan ruah mi a si. Cucaah, hi bantuk hi hmailei ca ahcun a tha lo, kan duh lo.
A donghnak ah, Media role: Media nih an tuah ding mi cu a cang cuahmah mi kha a can ning tein hlathlainak tuah a si. Cucu, an rian in mizapi sin ah thawngpang dik le thawngfian a um khawhnak hnga thawngzamh nak an tuah mi le thawng an thlah ruang ah nan tlaih hna. Hihi anmah an rian an tuah mi a si. Cucu, media zulhphung he a rian a tuah ko mi cu, Ziah nan tlaih? Tlaih awk a si maw? Cucu nan ruah deuh a hau!

A donghnak:

Rev. Nawl Cung Lian

Caan pek in nan rak kan ton caah kan i lawm. Nan tlaih hnik mi hna kong kan theih. Kan theih ning ah, an hruaitu pawl nan tlaih ding mi cazin (list) nan khawmh, cuchung ah Pastor mino cheukhat nan cazin ah nan khawmh mi hi a tha lo. A taktak ahcun, Pastor/Mino deuh hi hruaitu zong an si lo. Cun, atulio mino [duhlonak langhter mi] zong hi hruaitu an ngei lo. Amah le Anmah a tlangtla mi le a hruai mi an si. Nan tlaih hna ahcun thil tha lo chinchin a chuak kho. Cun, atuhi tam deuh cu Mino an si bang, nanmah lei in hramhram tukvelh, hriam hman (violent) le tlaihkhih nan thawk a si ahcun, Mino cu hi nak hin an hrang kho. Nanmah hi nan biapi ko. Nanmah nih nan thawk lo ahcun, Mino pawl nih rikhiah (Limit) an i chiah mi an lonh ve lai lo. Nain, nanmah nih nan thawk sual ahcun, an ri an lonh khawh ve caah tihnung chinchin. Cucu, thil tha lo a chuak kho ding mi a si. Nanmah ca zong tha lo, kanmah ca zong a tha lo tikha theihter le a donghnak ah chim ka duh.

Hi tonbiaruahnak a dih bak ah, Hakha Times CEO Lal Awmpui le Methodist Pastor Rev. Ngun Tum Lian an rak thlah hna.

A cunglei hi meeting chung siseh, zapi sin ah chimmi chung in mizapi theih a herh bak tiah kan ruah caah a tawinak in tial chin than mi a si. ~ Editor