Thil Thumh Caan A Tlawm Tuk Ruang Ah Hakha Thil Thumh Phu Harnak An Tong
Salai Cung Cung |2019 January 17| Sipin nih thilri thumh-khin caan ri an khiahpiakmi hna a tlawm tuk ruang ah Hakha Thilri Thumh-Khin Phu harnak an tong. Cu ruang ah January 15, Hakha zungkipfonh zung hmai ah cozah zungkai caan le tin caan dah ti lo paoh thilri thumh-khin khawhnak nawlpek ding in duhnak an langhter tiah kan theih.
“Sipin nih thilri thumh-khin caan rikhiahpiakmi hi a tlawm tuk. Zing suimilam 6-8 tiang, zanlei suimilam 4-5 kar tiang, nikhat ah suimilam 4 chung lawng rian kan tuan khawh caah harnak tampi kan tong. Hakha cu a kih tuk caah zingka sml. 6:00 ah dawr hung rih lomi le zanlei sml. 5:00 hnu cun dawr a kharmi zong an um cang. Hakha ahhin nikhat ah motor 12 tluk an phan nain hiti thil thumh caan le riantuan caan a tlawm tuk ruang ah nikhat ah motor pakhat hmanh kan dih kho lo. Riantuan lo in kan um sawhsawh caan a tamtuk, chun karlak ah an it sawhsawh ko. Motor pakhat hi nithum kan rauh caan zong a um. Cu ruang ah rian kan tei lo tuk pin ah voidang nihlawh kan hmuh zat zong kan hmu kho ti lo” tiah Hakha Thilri Thumh-Khin Phu lutlai Pu Van Tin Hmung nih The Chinland Post ah a chim.
Thil thumh caan ri an khiahmi a tlawm tuk ruang ah caan karlak chung vialte riantuan lo in an um sawhsawh i voidang i nikhat ah ks. 10,000 an hmuh tawnmi kha atu cu ks. 3,500 in 5,000 kar lawng an hmuh khawh cang. January 15 chun i thilri a thumtu motor pahnih Sipin nih an tlaih hnu in zungkipfonh zung hmai ah suimilam 2 chung thil phor motor 200 tluk dirternak in Thilri Thumh-Khin phu nih duhnak an langhter. Cu tikah riantuantu hna nih a tha bik in kan in tawlrelpiak hna lai va tin cang uh an ti hna i an tin than tiah kan theih.
“Dawr ngeitu hna zong nih thilri thumh kong ah minister sin le sipin sin ah an chimphuan ve a biapi tuk. Zung kai caan le tin caan te lawng ah hin thilri thumh i din u sihlaw aho ca paoh ah thiltha bik a si lai. Hiti duhnak kan langhtermi le kan chimphuanmi hi tuzarh chung kan hngah hna lai i zei ca hmanh a rat lo le an kan tawlrelpiak lo ahcun lampi ah thil thumh le thlak a um ti lai lo. Gate ah kan thumh dih lai i thil ngeitu nih anmahte in gate ah an rak i laak a hau cang lai. Motor mongtu zong nih thilri thumhnak i thilri a rawh sual cun tuanvo kan la lai lo an ti ve” tiah Pu Van Tin Hmung nih a biapeh ah a chim.
“Thil thum phu in riantuantu hi sifak santlai lo lawngte kan si. Thil thumh caan a tlawm tuk ruang ah nikhat ah tlawmte lawng kan hmuh caah chungkhar khuasak tintuknak fakpi in a kan hnorsuan. Cucaah, rian kan teinak ding le nikhat ah ks. 10,000 tal kan hmuh khawhnak ding cozah lei nih a kan tawlrelpiak a herh” tiah Thil thumh riantuantu upa pakhat nih The Chinland Post ah a chim.
Hakha thil thumh riantuantu pawl hi an zapi minung 45 an si. Thilri thumh-khin caan tamdeuh chappiak ding in Hakha Thilri Thumh-khin Phu nih cozah sin ah voithum tiang ca an chiah cang nain nihin tiang an tawlrelpiak rih hna lo tiah theih a si. ++++
About The Author
