Thimnak a lim hnu, dihdongh beh lo ah a herh

Salai Tluangkipthang — Nov. 8 a hun tlin tiang ah, Chin miphun nih kan hman ngai ve mi Facebook hun kau ahcun rampi thimnak kongkau lawngte a si. Nain, thimnak a hun i lim hnu ah a hung dai ruahmah.

Facebook lawng ah silo in a leng zong ah a hung dai ngaingai! Hihi a daih mi hi Kawl nih Puaipi Mite an timi Kawl pawl an Pha-za puai lio i, mei a ceu tuk mi a dih le cangka in muipadap in hung um a simi bang kan ramkhel sining a mih lo ding a biapi hringhran.

Rampi Election a lim thla khat bakte a tlin a si. Atu kar hmanh ahhin, cheukhat cawlcanghnak cu a hung dai ngaingai. A ruang tampi a um kho men. Teinak a hmu mi, a tei lo mi he hun zoh ah hmuh khawh a si. COVID-19 boruak ruang zong ah a si kho men. Nain, hitin daih peng lo ding a biapi hringhran hnga!

Cucaah, a ralai mi thimnak caah cawlcanghnak tha tein ngeih a herh colh mi a si. Naite ah tuah a simi Rampi thimnak ah tuah mi, Pyine Hluttaw, Amyotha Hluttaw le Pyithu Hluttaw palai thimnak kong cu kan mithlam ah tampi a cuan khawh rih ko caah tampi chim a hau ti lai lo dah!

Hmailei belte ah cozah nawlngeitu nih an zoh than a herh mi pakhat cu Rampi Thimnak (General Election) tuah ning hi a si. Voikhat pi ah tuah a si tik ah, Thimfung thlatu mipi an lung a fiang lo. Cucaah, hihi cu hmailei ahcun cozah nih Amyotha Hluttaw le Pyithu Hluttaw palai thim caan le Pyine Hluttaw thim caan tbk. thlen remh a hau ding mi a si. Kan innpa ram India hna ahcun, Upper House (Rajya Shaba) kanmah Amyotha Hluttaw palai thim caan cu a dangte in an tuah. An tuah ning cang zong a tha ngai mi cu palai dihlak in voikhat te ah thlen an si lo. Mahbel, hi bantuk remh khawhnak didng ahcun 2008 phunghram zong cu thlenremh a hau hui. A fawi lo!

Cucu, a fawi lomi caan chung ah hitin thimnak a hei kal thluahmah ko ahcun, kan miphun le ramkhel sining hi zohchun a herh mi tampi a um. Cuchung ah, zeihmanh an kan rel tuk lem lo mi kong ah tampi kan zoh than a hau. Cu hna chung in pathum te ka hun char;

Khuabawi/Sang uktu Thimnak,
Inn 10 le Inn 100 Uktu Thimnak,
Sipin Thimnak hna an si.

A cunglei pathum hi a biapi ah kan chia tuk lo nain, riantuannak ah anmah hi an i tel zungzal. Amah hi a cozah uknak phung ah dengteo in a pehtlai mi an si. Thimnak he kan zoh chih a si ahcun, Thimnak kongkau tawlreltu ah an i telh colh. Cucaah an biapit nak a si.

Cu an biapitnak cu chia tak in, thil dang deuh hin zoh tuah usihlaw, tahchunnak ah Hakha Dawrthar Sangngan (Ward) kan zoh a si ahcun, Thantlang khuapi nak in a ngan deuh. Hika ah Khuabawi (Sang uktu) hi felfai tein thim a herh. MP le Vuanci te hlan ah kanmah he direct in pehtlaihnak a ngei mi cu Sang/Khuabawi an si. Cucaah, an kan uktu an si caah hi pawl thimnak hi a biapi.

Atu ah, Hakha in kan chim ahcun, Sang (Ward) 8 a um cang, cucu uktu hna thimnak hi a biapi tuk hringhran. Cu ve thiamthiam in, inn 10 le inn 100 uktu hi an biapi tuk. Inn pawngkam, sang veng runvennak, thanchonak ah anmah hi a biapi an si. A dang pakhat cu Sipin Thimnak hi a si. Tulio cozah umtuning ah Sipin hi amah tein a tawlrel mi a si. A dang cu cunglei Nay Pyi Taw lawng tein nawlngeihnak tawlrel a si. Sipin committee chung ah a felfai, khuaraut kho mino, riantuan kho taktak ding mi tampi in telh a herh cang.

Cucaah, hi vialte hi Rampi Thimnak he pehtlai lo bantuk in chiah sawhsawh lo in cozah tlaitu party a si lo mi nih fel tein zoh, timtuahnak ngei in dir a herh cang. Khuabawi le tlangpi thimnak kong ah felfai tein ruah a herh. Hihi ramkhel ca lawng silo in, Khuatlang zohkhennak ca hrimhrim ah biapi tuk mi a si! Cucaah, a luan cia mi thimnak bang, Khuabawi cu an nih Party an si dih e, an nih cucu an si e timi ruahnak a um ti nak hnga lo a biapi. A hlan kaan tein, a hrihhram a si mi pawl thawk in felfai tein ruahnak le thazaang chuah a herh cang….