Thing An Tlaih Dih Ruang Ah Chin Miphun Ni Tuahnak Caah Harnak An Tong

0

Tawk Tling Thang| 2019 February 13| Chinram cozah nih phungningte in thing zuar a onh lo ruang ah Hakha ah thing a zuarmi paoh tuanvo ngeitu nih an tlaih hna ruang ah tukum Chin Miphun Ni tuahnak caah mizapi cheukhat harnak an tong tiah kan theih.

Hi kong he pehtlai in Hakha Pyidawta sang in upa pakhat nih, “Cozah nih thing zuar a onh lo. Inntang fimmi tiang in cozah sahngar pawl nih an tlaih dih hna. Inn saknak ding thingrua kong ah kutzungthiam le inn ngeitu vansang kan laam. Thing cawk ding a har tuk tikah thing man a fak tuk. Cu lawng si lo in Chin Miphun Ni caah donhhlei (stage), eidin dawr, paih tual, mandate tibantuk saknak ding thing cawk a har tuk ruang ah fakpi in harnak kan tong. Thingchia, thing pelpawi khawmh in sak a si tikah a har hringhran ko. Cu ruang ah cozah nih phunglut te in thing zuarnak a onh zokzok a herh” tiah The Chinland Post ah a chim.

Hi kong he pehtlai in Dawrhlun sang kutzungthiam upa pakhat nih, “Hiti cozah nih thing zuar an khamhnak le an onhlonak hi a sau tuk cang. Nai hoihna cu thing a zuartu he a cawtu he an tlaih hna pin ah thing cawkciami thing a phortu tiang tlaih an tong. Hi ruang ah inn ngeitu hna harnak tampi an tong. Kan herh lio caan i innsaknak thing a um lo i lim ding ni caan ah kan lim kho tawn lo. Inn kan sak cuahmah liomi inn saknak thing kan cawk i inntang ah kan chiahciami lila zong an an tlaih dih hna” tiah The Chinland Post ah a chim.

Tukum Chin Miphun Ni caah dawrkhaan tuah aa timmi upa pakhat nih, “Thing cawk awk a um lo ruang le cozah nih thing zuarmi le cawkcia mi zong an tlaih dih ruang ah dawrkhan saknak ding thing kong ah harnak tampi kan tong. Kanmah lawng si lo in mandate le donhhlei (stage) saknak tibantuk zong ah harnak an tong cio. A ruang cu thing cawk ding a har tuk ruang le cozah nih an tlaih ruang ah a si. Zeidang ni i an tlaih hmanh ah Chin Miphun Ni tuahnak ca tal ahcun cozah nih thing zuar a onh awk a si. Hiti harnak kan tongmi hi cozah ukhruainak le tlangtlaknak a that lo tuk ruang ah a si” tiah The Chinland Post ah a chim.+++

About The Author

Na ruahning rak langhter ve.. (Leave a comment)

%d bloggers like this: