Thla 3 chungah Matupi peng, Hteebwe khuami 13 nih bom an i lamh
The Chinland Post | 2022 April 6 – Chin ramkulh, Matupi peng Hteebwe khuami 13 nih 2022 January in March thla tiang ah SAC ralkap hmanhmi bom an i lam sual ruangah an i hliam. Pa 12 le nu 1 an i hliam.
Bom hmanhmi an i lamh sual ruangah Mizoram, Aizawl siizung ah an i thlop caah tangka lei chanbaunak an tong tiah theih a si.
“ Pa 7 cu an ke a bul. A dang 5 hi an ke le an mit an i khawng. Nu pakhat hi facang chiahnak ah facang a lak dih hnu a kir pah ah aa lamh sualmi a si. A vakmi caw le na pawl hi bom an i lamh sual ruangah a thimi an tlawm lo. Hteebwe khua pawng ralkap phu nih khua kulh in bom an hmanh, a ṭha lo ngai” tiah a fapa bom aa lamh sual vemi khuami pakhat nih Zalen ah a chim.
Bom aa lamh sualmi cu ramdang ah i thlop khawhnak hnga caah tiin Hteebwe khua in mawṭaw le cawleng hmang in zarhkhat leng dot khat hnu dot khat kal a si.
March 2 chung lawng ah pa 2 bom an i lamh sual caah Hteebwe khuami nih thinghlam le facang chiahnak lei ah a hohmanh kal ngam loin a pawngkam khua ah an i ṭhial tiah theih a si.
Matupi peng, Hteebwe khua pawngah SAC ralkap nih hmun an khuarnak a um i a luancia September ah CDF nih an rak kah hna. Cu hnu ah thazaang chap in a pawngkam mipi kalnak hmunhma hna ah bom an hmanh hi a si tiah Zalen thawngzamh nih a langhter.
About The Author
