Thla 6 Chung Ah Chin Miphun 100 Leng An Thi Tiah ICA Nih A Thanh
The Chinland Post | 2023 July 5 — Hramhram in uknak lak a si hnu kum 2 le cheu leng caan chung ah SAC ralkap nih thah ruang ah a nunnak a liam mi Chin miphun kan tam chin lengmang i 2023 thla 6 chung ah Chin miphun 100 leng SAC ralkap nih a thah hna tiah Institute of Chin Affairs – ICA nih July 4 ah cathanh a chuah.
2023 January in June thla tiang thla 6 chung ah SAC ralkap nih Chin miphun 109 a thah hna i cu chung ah mipi sawhsawh 50 le CDF/CNA chungtel 59 an i tel tiah ICA nih a langhter.
A nunnak a liam mi hna cu mipi sawsawh pa 34 le nu 16, CDF/CNA chungtel pa 58 le nu 1 hna an si tiah a langhter.
A nunnak a liam mi hna hi kahdohnak ruang, bomrap ruang, hriamngan ruang ah a nunnak liam mi an si hna i vanlei kahdohnak ruang ah a nunnak a liam mi an tam bik tiah theih a si.
Myanmar ram ah SAC nih hramhram in uknak a lak kum 2021 ah SAC nih Chin miphun 164 a thah hna i 2022 ah 195 a thah hna tiah an langhter.
2021 le 2022 thla 23 chung ah Chin miphun 359 an thi i 2023 thla 6 chung ah Chin miphun 109 an thi tiah an thanh.
Myanmar ramchung ah a cang cuahmah mi buainak hi vawlei cung ram hna nih ṭha tein zohfelnak tuah le hmual a ngei mi dantatnak hna an tuah a herh cang tiah ICA nih forhfialnak a tuah.
