Thla 6 Chung Ah Facebook Nih Account Nuai 1500 Renglo A Hlawt
The Chinland Post| 2018 November 19| Thla fatin a hmangtu nuai 2200 renglo a simi facebook account thianhnak hi record thar ah a lut. Facebook nih an thanhchuahmi Community Standards cathanh ning ah tukum Apirl thla in September thla tiang thlaruk chung ah account deu (fake account) nuai 1500 renglo facebook nih a hrawh/a thahpiak hna.
Hi cathanh chung ah facebook nih company i social media standard he aa tlakmi sex lei a hoihmi hmanthlak pawl, huatnak bia, dohkalhnak policy phozarnak, aa tlak lomi video content pawl le lih le hrokhrol in tuahmi account deu pawl ka thianh/ka hrawh hna tiah a langhter.
2018 kum thlathum chung ah facebook nih account deu (fake account) nuai 800 le a dang thlathum chung ah nuai 754 ka hnon, ka hrawh. Account deu tamdeuh cu cyber dohkalhnak caah an tuahmi a si tiah facebook company nih a chim.
Facebook zulhphung he aa tlak lomi post le account pawl dantatnak hi a hung thangcho ngai. Cathanh an chuahmi ning ah standard a buartu content hna i zatuak 95.5% cu online cung i tlangzamh a si hlan ah an hnon, an hlawt khawh manh hna.
Hi account deu pawl cu facebook i AI tools pawl in nifatin dothlat le hrawh an si i huatnak bia pawl zohfelnak ah AI hi zatuak 38% lawng a hngalh khawh rih tiah Facebook company nih a chim.
Facebook cung ah account deu nuai tampi a ummi hi khuaruahhar a si lo. 2018 kum a hmasa bik thlathum chung facebook cathanh ning ah January in March thla tiang ah account deu nuai 580 renglo kan hlawt piak hna tiah an langhter.
Facebook platform cung i cawlcanghnak pawl a zohfeltu moderator hna nih thlathum chung ah buaktlak in account deu nuai 6 le cheu renglo nifatin a karh tiah an chimphuan. Facebook nih atu thlaruk chung ah spam post zapi nuai 2100 renglo an hlawtpiak khawh hna.
Ref: Duwun
About The Author
