Thla 6 Chungah Ramleng Riantuan Mi Hna Nih Kawlram Um An Chungkhat Hna Sin Ah US Dollar nuai 526 Tluk An Kuat Cang Hna
TCP-Thantlang|2019 October 8| Ramleng lei ah riantuan Kawlram mi hna nih thlaruk chungah an chungkhat le hna sinah tukum January in June thla tiang (thlaruk) chungah tangka an kuat mi hna US dollar in nua 526.685 a phan cang tiah rian kongkau tawlrel nak zung cazin ning in theih a si.
Ramleng riantuan in Kawlram lei chungkhat hna sinah tangka a kuatu hna hi minung 556,148 tluk an si hna. Kawlram Union Bank cazin ningah cozah theihpi mi Agency dangadang cio in ramleng ah riantuan mi hna 2014 kum ah minung 137,959 hna nih US Dollar nuai 101.793 an kuat hna i, 2015 kum ah minung 340,986 hna sin in (US Dollar nuai 271.293), 2016 kum ah minung 501,901 hna sinin (US dollar nuai 461.185), 2017 kum ah minung 647,743 hna sin in (US dollar nuai 632.144 le 2018 kum ah minung 910,705 hna sinin (US dollar 909.814) tiang an chungkhat le hna sin ah an rak kuat cang hna tiah a langhter.
Ramleng um mi hna nih ramchung um mi sin ah tangka nan kuat han tik ah Bank tein kuat ah a tha bik, a ruang cu a him bik mi a si pin ah ramchung thanchonak (GDP) tiang a bawmhchanh caah a si. Cucaah cozah nih a ngeih mi Bank tein tangka kuat cio dingzong riantuannak kongkau zung Director nih a thanh.
Kawlram minung han cu a cozah nih ramleng lei ah phungning tein riantuan dingin 1990 kum lio ah a rak hun cang mi a si i felfai tein rian an tuan nak ding caah 1999 kum ah ramleng lei riantuan nak kongkau Upadi a ser piak hna. Cu hnu ah Agency 298 hna sin ah ramleng riantuan ding in minung a thlah hna. 1990 kum in 2019 kum June thla tiang ranleng riantuan mi zapi nuai 1.06 tluk an si cang. Cupin ah Thailand le Malaysia ram hna ah phungning in riantuan khawhnak an tuah piak cang hna. Ram chung mi zatuak 10 cu ramleng lei ah hlawhfa in riantuan mi an si tiah kan theih. (Xinhua)
