Thlaawr Bawihrin; Chin Miphun Nih Union In Kan Chuak Tiah Thanh Deuh Awk A Si
Rev. Thlaawr Bawihrin
Tawk Tling Thang| 2019 February 12| Chin cozah nih Ramkomh Ni (Union Day) a tuahmi kong he pehtlai in CBCUSA General Secretary Rev. Dr. Thlaawr Bawihrin nih Chin miphun le Chin cozah nih Union Day hi an tuah awk hrimhrim a si ti lo pin ah Union in kan chuak tiah thanh awk hmanh khi a si tiah The Chinland Post ah a chim.
Union Day kong he pehtlai in Rev. Dr. Thlaawr Bawihrin cu The Chinland Post nih a hmuhning tawite in biahalnak kan tuah i atu bantuk in chim hi a si.
“Chin miphun nih cun Union Day hi kan tuah awk a si lo tiah ka ruah. A ruang cu Union Day an tuahhnawh chanmi a nung lo. Tinhmi ah kal lo in lihmi ah an kal. Tlangcung miphun second citizen in ruah a si. Chin miphun cu miphun dang nih pemmi le ukmi 1935 tiang a si bal lo. Union ah kan um ruang ah Chin miphun sifah le lih phun ah kan cang. Sal tannak tuah a si tiah ti khawh a si”.
“‘The Impact Of Missionary Christianity on the Chins’ tiah ka tialmi cauk ah’ The British nih Chinram dihlak an lak cu 1935 ah asi. Union of Burma sinak caah Chin miphun nih min kan thut bantuk in asi lo caah, Union Day nih aa tinhmi an tuan lo ahcun Chinram cu automatic in Kawlram ah aa telmi state, co-founder of Union Of Burma sinak in chuah in 1935 bantuk in mah tein aa ukmi ram asi awk asi ko”.
Hika ah Rev. Dr. Thlaawr Bawihrin nih mirangca in a tialmi cabia tawite zoh khawh a si.
“Union of Burma minthut lio ah an ceihmi tlangcungmi caah apply an tuah lo caah Chin cozah le Chin miphun nih cun Union Day cu tuah cu chim lo, Union in kan chuak tiah thanhnak (declare) tuah deuh awk asi. Union in kan um ruangah sifah, retheih, fimnak ngeihlo nak cha cun, mah tein um i kan i uk ah kan thangcho lai, kan fim lai, kan hngalhthiamnak kha Chinram le Chin miphun caah aa hmang thiam lai. Kan Chinram cu Chin minung kut ah uknak/hruainak um sehlaw, kum 10 chungah Asia ram ah khuaruahhar ram, a thangchomi ram ah kan ser khawh lai” tiah Rev. Dr. Thlaawr Bawihrin nih The Chinland Post ah a chim.
“Tlangcung miphun hna cu anmah duhmi federal ramkomh, Panglong biahrennak in kan ser lai tiah hnatlakmi federal ramkomh cu nihin tiang an ser kho lo. Cuti ser khawhnak caah kum 70 tiang hriamtlaih in dothlennak kan tuah. Atu i ton biaruah a phi kawlnak lamthluan in a phi kawl a herhmi dirhmun kan phan cang. Cu asi caah cu bantuk dirhmun tang ah “Union Day” tuahmi hi cu sullam a ngei lomi asiloah thlum-alnak a ngei lomi union day tuah bantuk men a si lai” tiah Chin National Front in Chairman Pu Zing Cung nih February 7 ah cabia a tial.
Hika link ahhin Pu Zing Cung cabia tialmi Kawlca in relchih khawh a si.
Rev. Dr. Thlaawr Bawihrin hi CBCUSA General Secretary a tuan liomi a si. Ramchung ramleng Chin miphun nih bochanmi upa pakhat a si.
About The Author
