Thlachiatruahnak A Um Ti Lo; By Salai Za Uk Ling

2008 hrawngah khan a si rua ka ti, tleicia kan pa Rev. Dr. Sang Awr nih Singapore sizung a rak um lio ah cabia saupi pakhat a rak tial bal. A cabia nih ka lung a ka suk ngai ngai. A tial ning le ai biatak ning ka rel tikah lungthin tak te le ruah ciammam le siaherhnak taktak he a tialmi asi ti a lang ngai. A dam lonak kong ka hei ruah chih tikah miphun caah a siaherhmi pei ro a ka vuih ko hi timi ka lungah a hung chuak. Cu hlan 2004 lio i Dallas ah Centenary celebration hlunghlai ngai in ah an rak tuah lio ah Chinland Guardian News ah cabia sau in an tuahnak kong kha Mirangca in thawngthanhnak ka rak tial. Cucu Laiforum ah a rak hmuh i ka fapa nangmah maw na si a ka ti i email in conglawmhnak ca a rak ka kuat. Cu cu ka hngakchiat lio i karak hmuhnak in a voikhatnak a lang in bia kan i ruah hmasa bik nak asi. Cu hnu cun email in kum tam nawn chung kan rak i chawn pah lengmang. Na pa le he rian kan rak tuan ti lio chan pawl zong ka ngai dih e, a ka ti i a mah fa le a simi Sangpui le Hmung Hmung (Van Biak Hmung) khawika an um ti zong a ka chimh. Hmung Hmung he hin taang hnih tiang kan kai ti i, Thantlang an thialtak hnu in kan rak ihmu chap ti lo. Email cun biaphun phun kan i let. A cabia a tialmi ka lung a ka suktuknak kong te hna ka hei ruah ve. Kan hngakchiat lio i TABC GS a tuan lio, i Hmung Hmung sinah an inn i ka luhchuah, sianginn chunchuah i chuncaw ka va hrawn hna lio hrawnghrang lawng kha tha tein kai rak chinchiah.

A cabia a rak tialmi cu lungkuaikek in a tialmi a si timi fiang tein a langhnak cu, kha lio Ralkap uknak tang i khua a sami pakhat sinak cun tial ngam ding khi a si lo. Biaknak lei in le miphun sinak i a kan namneetnak kong, timhciammam in kan miphun le tlangcungmi  hna hrawh a kan timhnak le an izuamnak, cun zei ruangah dah Kawl ralkap hi an lung a ngan le an ning a hngal khun, Geopolitics ruangah Russia le Tuluk bochan in zei thil paoh a tuah ngam ning te hna, dothlatnak a tial. Kawlram ahcun uktu pawl nih rak thei hna seh law thongtlaknak ticket bak a si hnga.

“Kapa mah hi na tialmi hi vulei cung miphun dang le cozah dang nih a kan theih pi ve lomi hi a pam tuk, zei ti maw tal in Mirangca in chuah kho u sih law a tha hnga maw?” tiah ka rak hal.

“Na leh duh a si ahcun nangmah nih rak let te law rak zamh te ko uh” a rak ka ti.

A kan liam tak hlan ah ka let manh lo. 2011 hrawngah khan a si rua ka ti. “Threats to Our Existence: Rationalizing Persecution in Burma” tiah a biatlang thlen in ka rak leh i Chinland Guardian News ah kan rak tar. A cabia i a chim duhnak a muru tiah ka ruahmi kha tlangtar ah ka hman. A rak tialmi cabia a hmual cu nihin ni tiang a lang. 2012 ah kan ram i biaknak zalonnak kong repawt kan rak timhlamh lio ah zeidah a min kan bunh lai timi ah kan lu kan rak ikheuh. Kan repawt i mithmuh kuttongh i a langmi pawl bia tawi te in a huapmi biatlang kha kan rak kawl. Cu bantuk bia tawifang i chim tungmi, cun a chim tu hi authoritative (a chimmi bia kongah a hngal bakmi le huham a ngeimi a si tungmi) a si lai timi kha ruah chih a si. Cu kong kan iruahpah cun kan tuantimi kan hawinu Scotland nu nih “Threats to Our Existence,” kan miphun sinah a hrawktu tihnungmi kan ral, timi kha a van chuahpi. Rev. Dr. Sang Awr cabia kha a rak rel ve caah. Cu cu CHRO kan repawt tlangtar ah kan hman i “Threats to Our Existence: Persecution of Ethnic Chin Christians in Burma” timi cu vulei cung dihlak nih an kan theihpi. Kan repawt hnu lei phaw ah kan tialmi cu:

“Our people are still faced with threats to our existence… forced assimilation attempts, attempts to coerce us to convert our religion, the various restrictive measures, and finally the attempts to force us into submission under the tight control of one centralized government…. The situation in our homeland has pushed many of our people out of the country. What matters most now is our attitudes towards our homeland and the future survival of our people.”

“Kan miphun caah tih a nungmi ral a phunphun kan tong cuahmah…miphun dawpdolhnak, biaknak pakhat tangah hramhram lo in khumhchihnak, temtawnnak phunphun hna le uknak pakhat tangah hramhram loin um ternak kan tong cuahmah. Kan ram thilsining ruangah kan miphun hawi tampi hna cu ramlengah kan chuak hna. Abiapi bikmi tu cu hmailei kan ram le kan miphun caah zei tindah khua kan ruah i khua kan khan ti hna lai tit u hi a si.”

~ The late Rev. Dr. Sang Awr, former President of the Zomi (Chin) Baptist Convention

A cunglei a chimmi bia hi bia roling a si. Laica i a tialmi Mirangca leh ciami Laica in ka leh thanmi a si tikah a kheng dih lai lo nain, ka lung in kai cinken tawk in a khen bik dingin ka lehmi a si. Hi a cabia hi Laiforum Archive ah a um rih ttheo lai. A chimi lakah a biapi bik in miphun a kan hrawk tu kan ral a timi hi pahnih in a then: Achunglei ral le alenglei ral tiah. A lenglei ral cu fawi tein hmuh khawh a si a ti. Cu hna cu Kawl cozahnah nih dawpdolh le nanneetnak pawl kha an si i, a ho paoh nih hmuh a fawi caah cutluk in tih a nung tuk lem lo, kan i runveng kho ko a ti duhnak a si. Rev. Dr. Sang Awr nih a rovuih biacah ah a sia a herh khun i a tih zong a tih khunmi cu achung lei ral kha an si. Cu hna cu lungthin rawhralnak (moral decay/corruption) le thlachiat ruahlo te hna an si. Mifim bia rovuih cu kumcan a liammi nih a liampi khawh lo bang, a tu tiang sullam a ngei rih ko. Kan miphun chanchung a nguh lai.

Nihin ni kan ram kan cuanh tikah kan rawhralnak hi a lang chin lengmang. Lungthin rawhralnak nih eihmuarnak, ziknawhnak, lihchimnak, miphun zuarnak, thlachiatruah lonak, lainawn ngamnak, sifak santlailo zawmhteihnak kan ram ah a karh chinh thluahmah. Cucu mithmuh kuttongh an si. Miphun pakhat a silocun zatlangnun phu (society) pakhat, ram pakhat nih sunlawihnak “VALUE” hi ngeih cio a si. Mizo nih ‘tlawmngeihnak’ kha an ‘value’ ah an chiah. Kan nih miphun nih “tlachiatruahnak” hi kan ‘value’ a si ve tiah ka ruah. Ni hin ni ah thlachiatruahnak cu a sullam hmanh kan thei ti hnga dek maw? Thlachiat ruahnak nih thil tha kan timi vial te a chuahpi dih. Thiltha le nunzia dawh kan timi vialte a hnu lei ah thlachiat ruahnak a rak um.

Cu cu kan ram ah a um ti lo. Rev. Dr. Sang Awr nih kan nun pi rih seh law fakpi in a tap theo lai tiah ka ruah.

Na ruahning rak langhter ve.. (Leave a comment)

%d bloggers like this: