Thlahnih chungah ralhrang nih inn 4,000 deng an khangh
The Chinland Post | 2022 March 3 – 2022 thlahnih chungah ralhrang nih mipi inn 4,000 deng a khangh cang tiah Data for Myanmar cathanhnak in kan theih.
2022 February ah ralhrang nih inn 2,882 le January ah inn 1,059 khangh a si i a zaapi te inn 3941 khangh an si.
2022 February 1 in 2022 March 1 tiangah ralhrang phu hna nih hmun 165 ah inn 6,158 leng an khangh cang tiah Data for Myanmar nih a langhter.
2021 February December thla hi inn 960 a khangh i 2021 chungah a tambik an khangh a si i 2022 February thla ahcun inn 2,882 khangh a si caah inn an khanghmi a karh tuk ti aa thei.
2021 February 1 in 2022 March 1 chungah, Sagaing ramṭhen ah inn 3,689 khangh a si i Kawlram pumpi ah a tambik khangh a tongmi an si. Chin ramkulh ah inn 1,105 in pahnihnak a dir i Magway ramṭhen ah inn 885 in pathumnak le Kayah ram ah inn 311 in palinak khangh a tambik an si tiah Data for Myanmar cazin in theih khawh a si.
A luancia zarh hrawng ah, Yinmapin le Gangaw peng a kangmi inn pawl cu pehtlaihnak a har ruang le kahdohnak a um peng ruangah cazin a fiang kho rih lo tiah a chim.
Kan hrelh sualmi le kan lanhtakmi cazin pawl tete an um caah a taktak ah a kangmi cazin a tam deuh kho men tiah Data for Myanmar nih a chim chap.
