Thlakhat Chung Karenni le Thlanglei Shan Kahdohnak ah SAC Ralkap 280 Leng An Thi
The Chinland Post | 2023 April 4 — March thla chung, Karenni ram le thlanglei Shan ah kahdohnak voi 102 a chuak i SAC ralkap 281 an thi tiah KNDF nih April 3 ah a thanh.
Cun SAC ralkap le Karenni phufonh hna karlak kahdohnak ah SAC chungtel 13 a nung in an tlaih hna i SAC Infantry 12 in ralkap 1 MA-3 he KNDF sin ah aa fonh tiah an langhter.
March thla chung kahdohnak ah SAC ralkap sin in hriamhme zuun 51, hriamngan zuun 9 le kuanzen tampi telh in pehtlaihnak seh pawl zong an lak khawh tiah theih a si.
Kahdohnak chung ah SAC nih vanlei kahdohnak voi 66 nak tlawm lo a tuah tiah an langhter fawn.
Cun SAC ralkap nih khangh ruang le hriamngan kah ruang ah mipi inn 228 a kaang i phungki sianginn 2 le sianginn 3 a rawk tiah theih a si.
Vanlei kahdohnak ruang ah mipi 5 an thi i SAC leiṭang phungki 3 telh in mipi 25 an thah hna. Vanlei kahdohnak le hriamngan ruang ah sualnak ngei lo mipi 29 an i hliam tiah cathanh ah hmuh khawh a si.
March thla chung kahdohnak ah KNDF hriamtlai 12 nih ram le miphun caah an nunnak an pek tiah KNDF cathanh ah hmuh khawh a si.
About The Author
