Thlanglei Kalay ah ni 2 chung kahdohnak a chuak i CDF-KKG in mipi hriamtlai 1 a nunnak a liam
The Chinland Post | 2022 March 10 – Sagaing ramṭhen, Chaklei Kalay, Natchaung le Htumar khua pawng ah March 8-9 tiang mipi hriamtlai phu le ralhrang karlak ah kahdohnak voi 2 a chuak. Cu kahdohnak ahcun, Chinland Defense Force-Kalay-kabaw-Gangaw (CDF-KKG) in mipi hriamtlai pakhat nih ram caah a nunnak a pek i mipi 2 an nunak a liam tiah CDF-Kalay nih a thanh.
Yangyiaung khua ah hmunhma a khuarmi ralhrang thazang 70 hrawng cu March 6 ah Thanpho, Kwekyin, Helauk, Aungchiantha, Ngapha khua hna tan in Natmaung khua lei ah kahdohnak an thok.
March 8 chun sml 2:00pm hrawng in Natmaung khua nichuah lei ah ralhrang le PDF-Kalay, CDF-KKG, CNDF, RKDF le mipi hriamtlai phu hna fonh in mins 30 hrawng kahdohnak a chuak. Ralhrang nih Natmaung khua chungah hriamngan in a kah caah Natmaung khua phungki sianginn a khen. Phungki sianginn ah aa dormi mipi 3 cu hriamngan nih a khen hna caah 1 a nunnak a liam tiah theih a si.
Cu kahdohnak ah CDF-KKG in Johan Htet Naing Zaw nih ram caah a nunnak a pek. Lam hmuhsak ding ah an i hruaimi Natmaung khuami 1 zong khualu lei ah an kalpi i a lu ah meithal in an kah.
Cun, March 9 zinglei ah chaklei Natmaung in raltuknak a thokmi ralhrang pawl cu Insein khuahlun tan in PDF-Kalay nih hriamngan in an kah hna caah Htumar khua ah mins 20 chung kahdohnak a chuak ṭhan.
Ni 2 chung kahdohnak ah ralhrang lei in a thimi zat a fiang in theih khawh a si rih lo tiah PDF-Kalay nih March 9 ah cathanh a chuah.