Thlathum Chungah Leiba Cham Khawh Lo Ruang In India Lothlo Minung 639 Anmah Tein An I That

0

Salai Aung Aung| 2018 July 15| India ram ramkulh pakhat ah March in May tiang thlathum chungah leiba cham khawh lo ruang in lothlo minung 639 anmah tein an i that tiah theih a si. A ruang cu khuati aa nincang lo tikah an cinthlakmi eibar a chuak lo i Bank ah tangkaa an cawimi a cham kho ding an si ti lo caah a si.

Ngunkhuai tlaitu Minister pa nih, “2018 March in May kar thla thum chungah lothlo minung 639 cu an leiba a cham kho ding an si tilo i anmah tein an i that. Anmah chung in 188 cu cozah nih liamhrulh mi tangkaa a tingco ding an si. Cozah nih ri a khiahmi cinthlak rawhralhnak rikhiah mi ning in Bank i an cawimi tangka a cham kho ti lomi lak ah hi hna hi cham ter loin awlh ding aa tlak mi an si” tiah a a chim.

188 chung ah 174 hi an liamh cang hna i 122 cu liamhrulh ding aa tlak lomi an si. Cun a tangmi 329 cu liamh dingah an tlak le tlak lo an chekhlat cuahmah lio a si nak kong a chim fawn.

Dohdalhtu party leikap nih cozah Bank nih lothlo pawl tangka cawih ning le cinthlak an sunghralh tikah an liamh mi hna kong ah rian an tuan ning hi a tluang mi a si lo ti cu tu thlathum chung i lothlo hi vialte anmah tein an i thahmi nih a langhter tiah an chim.

2017 kum khat chungah khan amah tein aa thatmi lothlo 1500 an rak si. A luancia kum li chung kan zoh tikah amah tein aa that mi 13,000 tiang an phan. A luancia kum 20 chung zoh tikah amah tein leiba cham khawh lo ruangah aa that mi lothlo minung sing thum an si tiah phung ning tein an langhter.

An ramkulh Chief Minister pa nih, a leng in tangka an cawimi a karh pek khawhnak ding caah a lohmun a zuar chungmi lothlo pawl an vawlei hmun an lak khawh than nakding kan bawmhchanh hna lai tiah a chim.

Ref: BBC Burmese

About The Author

Na ruahning rak langhter ve.. (Leave a comment)

%d bloggers like this: