Thuro Kua Cu Pupa Ram Hrimhrim a si
676 Ekah Hakha Sangthar/ TCP August 3, 2019
The Chinland Post | 2019 September 4| Thuro kua (Ekah 696 chungtel) cu pupa ram bak a si. Pu Thla Cung, Pu Khua Kung le Ral Kham hna nih pupa ram a si lo tlangram sathek ram a si tiah hngalh lo le theih lo bu in an chim le an au khuan mi a si nak kong hi mizapi theih in langhter ka duh.
Sangpi chung ramukbawi Ral Mon Fapa Pu Peng Mang le Ram Uk Bawi Pu Thang Hliang (Dar Khuah Chung) hna nih ram an i cuh i, taza an i cuainak hmun a si. Ram ukbawi hna nih Sathek le Tlangram an i cuh bal lo, taza zong an i cuai bal lo. Biaceih zung nih Dillo lam-cintlaknak-CCF tiang (saktalam hlun) lam chak khi pu Ral Mon a ram a si. Sakta lam hlun a thlang Nawi Va tiang Pu Thang Hliang ram a si tiah bia khiatnak an rak tuah. Cun pu Ral Mon fale hna le pu Phun Thuan tufa hna nih an chim mi zong a si. Atu an mah zong hal khawh an si ko.
Pu Thang Hliang nih Pu Phu Thuan fapa min a rak sak i, lai phung ning tein a tu Thuro khua ram vial te khi min sak man ah a rak pek hna nak hmun a si. Cun Pu Phu Thuan sin ah Pu Tei Vak nih cawpi pa 5 le tangka 900 in a rak cawk hna. Pu Tei Vak a thih tik ah roco tu a si mi Pu Hmet Al le Pu Thang Val nih an peh zulh. Caw, Naa, Rang, Ar tibantuk tampi an zuat. Lo le lei kaupi an tuah. Thingkung phunphun an cin. Pu Hmet Al khi Thuro khua ah a rak chuak mi a si i a tu kum 80 a si cang. Apa chan in an tuan cangnak hmun a si caah a tu kum 90 leng an pum cawnnak caah peh zulh in an um hnawh, an tuan cangnak hmun a si.
Thuro khua hi Pupa ram a si a fiannak (Evident) hna cu,
- Mirang nih record an rak chiah mi
- Pu Phu Thuan tufa hna sin in hnatlaknak
- Pu Ral Mon fale hna sin in hnatlaknak
- Pu Hmet Al cu a pa Tei Vak Roco tu a si i kum 90 lengchung a thawh tuan i a um hnawh cangnak khua upa minung 10 hnatlaknak (Upadi nih cun minung 3 nih tha tein an hna tlak ah cun pupa vawlei ah nan co hlan piak lai ti a si.
- Thuro khua cu pupa ram a si . Cozah zong nih Sipin Area a si cangnak thawngthanh zong a um lo. Cun khua samhnak caah hman ding in ceihkhannak le tonnak zong a um lo. A tu sangthar samh ding mi cu Upadi ning lo in an tuah tuan mi a si caah inn hmun an in pek zong ah duhlohnak ca kan tial peng lai. Inn na sak a si zong ah mi vawlei ah inn na va sak chung mi a si ko lai. A tu i sangthar samh mi i upa a tuan mi hna hi bawi an tuan zungzal lai lo. Upadi a zul mi cozah nih an kan hruai te tikah (evident) dikfel mi pawl he vawlei ngeitu nih an vawlei an hlam than te tik ah cun na inn cu na thek a hau ve te ko lai.
Catialtu: Pu Tial Mang
Biakilh: Hi cabia cu The Chinland Post hmuhning le ruahnak aa tel lo.
