Tial Cung Thang Nih Cohlannak A Ngeih Ah Cun Boxing Kan I Thong Ko Lai: Lal Sang Lian Cinzah

Salai CungCung|2019 July 29| Lal Sang Lian Cinzah nih Boxing a zuamcawh mi MMA Fighter Tial Cung Thang nih aa cohlan ah cun Yangon si lo le Hakha ah Boxing an i thong lai tiah kan theih.

“Hi Boxing tuahnak kong cu zeihmanh chim awk a tha rih lo, a ruang cu Tial Cung Thang nih a cohlan le cohlan lo ai fiang rih lo caah zei tik ni, khuaka ah, laksawng pawl zeizat, tibantuk hi chim awk a tha rih lo. Tial Cung Thang nih cohlannak a ngeih ah cun an mah Boxing lei tlangtlatu hna he Yangon si lo le Hakha ah kan tuah te ko lai. Hi Boxing thongh cu khat lei nih cohlannak an ngeih ah cun boxing lawng in cun a tawi tuk lai caah a dangdang paih tibantuk zong telh chih a hau te ko lai” tiah Salai Lungthil Tum nih The Chinland Post ah a chim.

“A tubantuk in ka zuamcawhnak a ruang cu, zuamcawh ti khi a si lem lo, lente aa celh mi veve kan si tik ah a mah he lentecelh ti ka duh ko ti ka chim duhnak khi a si. Pakhat le pakhat i rem lo nak le i huatnak si lo in kan nih cu lentecelh mi kan si tik ah a nih hi MMA ah Champion pakhat a si ve caah kan mah lei zong nih zuamcawh kan duh ve cio, cucaah tubantuk in ka zuamcawhnak hi a si. Tu tiang ah cun a mah lei nih zei hmanh bia lehnak a um rih lo le zeihmanh kan puai kong chim awk a um rih lo” tiah Lal Sang Lian Cinzah nih The Chinland Post ah a chim.

“ Kei hi Myanmar thiamhlei team ah kum 4 leng ka rak i thong, nain tu cu kaa din cang le Dubia ah rian ka tuan. Cun rian tuan pah in Dubia ah voi 3 leng kaa thong . Boxing voi tampi cu ka rak i thong cang, Kumkhat ah hin puai 4 leng kan ngei peng. Boxing thongh hi puaikhat lawng in Direct in i thongh si lo final tiang kainak ding ah hin voi 4 hrawng thonh a si. Cucaah Boxing ka thongh mi puai cu a tam ngai cang. Puai ngan kaa thonghnak cu kawlram ai-awh in Yangon ah Korea pa le Pakistan pa he kan rak i thong bal, cu lio ah cun teinak ka rak hmuh. Cun ramdang kaa thonghnak ah Philippine pa le Egypt pa he voi khat veve kan i thong i teinak ka rak hmu. A dangdang teinak ka hmuhnak cu kawl ramchung ah Minister Cup tibantuk le ramkulh, ramthen Boxing zuamnak tibantuk ah teinak tampi ka rak hmu bal cang. Pathian thawng in teinak ka hmuh a tam deuh.” tiah Lal Sang Lian nih The Chinland Post ah a chim.

“Taang 7 khar pi in Falam khua mi ralkap Pa Biak Lian nih Training thlahnih leng a sin ah ka kai. Cu hnu ah ramkulh, ramthen zuamnak a um i cu ah cun Pago ramthen ai-awh in kai zuam i pakhatnak ka hmuh. Cu pakhatnak ka hmuh hnu ah Boxing ah ka luh. Myanmar zaanglek sianginn ah kum hnih ka um i cu hnu ah Myanmar thiamlei team ah an ka chiah. Tial Cung Thang ka zuamcawhnak kong he pehtlai in mipi sin chim ka duh mi cu, mipi nih bia tha lo hi a chim tuk caah hi bantuk cu i rem lonak le i huatnak si lo in lentecelh mi kan si tik ah hi bantuk cu i zuam cawh phung a si ko , cucaah biachim hi i ralring deuh hna u sih ti ka chim ka duh. A mah lei nih ka zuam cawh mi a ka cohlan ah cun Traning tha tein ka tuah lai. Tu cu zei hmanh bia lehnak a um rih lo caah ma tluk in cun ka tuah rih lo. Training biatak tein vun tuah ah cun mah le mah cu mizei poh kan tei lai ti cu kan i zumh dih cio ko. Kawl ram lei kan ei din le ramdang an ei din cu ai dang tuk ngai nain Traning lei ah hin mah le si khawh tawk in kan i zuam ve lai” tiah a chim chap.

Lal Sang Lian Cinzah cu Thantlang peng, Khualhring tlang, Lungzarh khua mi pu Mang Hei le Pi Rem Nei hna i an fa le minung 7 lak ah a upa bik a si tiah kan theih.