Tikir Dam Hunnak Pupawng Lungcawi Khua Ah A Tla
Tawk Tling Thang| 2019 January 20| January 20 zingka, Thantlang peng Tikir khua ah Myanmar rampi Ruahnak Petu Daw Aung San Suu Kyi nih Tikir Dam le Electric Mei hunnak tuahnak ah thlahmi pupawng cu khuaruahhar taktak in Hakha peng Lungcawi khua ah a tla.
Hi kong he pehtlai in Lungcawi khuami Samuel Van Lal Cung cu The Chinland Post nih pehtlaihnak kan tuah i atu bantuk in a kan leh.
“Tuchan suimilam 12:30 hrawng ahkhan kan khualuhnak hauka ti-inn kam te ah pupawng a tlami cu khua upa nih an hmuh i kan char. Mah pupawng ahcun Tikir Dam Hunnak timi ca aa thlaimi aa tel chih caah Tikir Dam hunnak ah an thlahmi Pupawng a si ko hih timi kan hngalh khawh than. Hi tluk Tikir le Lungcawi khua aa hlatmi Tikir khua in thlahmi pupawng, kan khua tiang a rak zuan i kan khua thengmang te i a tlak cu kan khuaruah ahar tuk hringhran. Kan khuachung lam min ah Pu Henry Van Thio lam tiah min sakmi le catarmi a um. Cu ruang ah cu pupawng cu kan va char i Pu Henry Van Thio lam timi catar cung te ah kan bah, kan thlai”.
Cu kan khua ti-inn pawng ah a tlami pupawng kan char khawh tlawmpal ah kan khuachak lei pi ah pupawng a zuangmi pakhat kan hmuh than. A tlaknak taktak cu kan hngal lo, kan khua pawng thiamthiam ah tlak dawh a si ko. Pu Henry Van Thio lam catar cung ah kan bahmi pupawng cu ngakchia pawl nih pahnih thum cu an dawh bang dih. Cu catar cu an laak than i upa nih thate in an fim” tiah Samuel nih a biapeh ah a chimchih.
Social media cheukhat nih Lungcawi khua i Pu Henry Van Thio lam timi catar cung thengmang ah a tla tiah a dik lomi ning in an tial. Ti-inn kam te i a tlami kha khuami nih an va char i Pu Henry Van Thio lam timi catar cung ah an bah i cu bu cun hmanthlakmi a si tiah thawngpang dik cu TCP nih khuami sin kan theih.
Photo: The Chinland Post @Salai Elvis, Mimhrin Aung Sp @Chinland Daily News fb
About The Author
