Tikir Khuami nih Vomkua Khuami Dinti Lakmi an Hrawhpiak Hna timi Fianternak

Editor Cakuat|2019 August 23| Online Website Vakok Authawng nih August 19, 2019 ah Tikir Khuami nih Vomkua Dinti Lakmi an hrawhpiak hna tiah thawng an zamh. Ca lawng silo in Video he thawngzamh a si. A liam cia caan ah Vomkua khua hi Dinti an harsa ngai. Khua nupa kan si caah an konglam kan theih ngai hna. Vomkua he kan iramri phak lai ah Tihnah a tha ngaimi a um i cucu a min ah Thuangti dong hna tiah nihin tiang kan auhmi a si. Tiva a luangmi silo in cerh in a putmi tihnah a si caah cerhpi a timi zong an um.

September 27, 2004 ah Vomkua khua nupa an ra i, vok an van ihruai i Thuangti donghna kan timi cu Dinti caah an kan hal. Khua nupa nih silo cu khua nu le khuapa pei kan si cu va hmang chung ko u amah belte Khua nih hman kan herh cang kan ti tikah aho hmanh ngaichiat a um lai lo. Zeica tiah kanmah khua zong Dinti a harngaimi kan si caah kan hman hlan paoh cu hmang chung ko u tiah phaisa fangkhat hmanh la lo tein kum zeimawzat chung an hman ve. Caan a van rauh deuh tikah anmah Vomkua an ramchung tiva khuaiva an timi hi Tihnah tha ngai a si caah an lak than. Dinti ahcun an inuam ngaingai. Tikir an kan halmi hi zeiti huaha in an bultawl ti lo. Tikir hi dinti kan izat ve lo tikah 2016-2017 Chin ramkulh Budget ah Meng 3 ca in Natalah ah kan sok. Hna an kan tlakpi i an kan pek. Tikir khuabawi nih Vomkua khuabawi sinah thawng a hei thanh i dinti kan rak in hlanhmi hna kha kanmah hman kan herh ve cang caah kan hmang ve cang lai tiah thawng a thanh hna. Cu hnu ah Natalah an rak tlung i Survey hlathlainak an rak tuah. A meng an tah I meng 4 renglo a si caah ameng a tam deuh caah kumvui budget ah kan thlakpiak hna lai an kan ti i nihin nitiang kan hman khawh rih lonak a si.

Tikir nih an hrawh tiah Vomkua nih an timi hi 2017-2018 Tikir le Lulpilung, Tikir le Vomkua lam cawhnak le kauhnak ruangah lam nih a hrawhmi tu a si. Tikir Dinti laknak kan timi zong project a tlak rihlo caah nihin tiang kan hman khawh rihlonak a si. Vomkua nih dinti an rak lakthing nak zawn tu kha lam nih a hrawh dih cang caah Pu Hniang Kam nih dum tuahnak le nga-kaan tuahnak caah caan karlak hmanchung a duh i amah pumpak in bilatme le lungin nuai le kulhnak a tuah hnu ah a hman chungmi tu a si tiah fianter kan duhmi a si. Nihin ni tiang Vomkua le Tikir hi khua nupa te kan si caah aa dawmi kan si ko ti kha Fianter kan van duh.

Tikir Khuami ai-awh in

Pu Van Lian Thawng