Tikir UPC Lung Biakinn Sunglawi Ngai In Hunnak An Tuah Cang
Salai Elvis| 2019 January 19| Thantlang peng Tikir khuathar UPC Lung Biakinn cu January 19 zinglei suimilam 8 tluk ah Vice President Pu Henry Van Thio te chungkhar le UPC Founder Rev Dr. Ral Buai chungkhar hna nih sunglawi ngai in hunnak an tuah cang tiah kan theih.
Hi lung biakinn cu France ram Architecture thiamsang hna nih a muisam ( an suai) hnu ah IGE Com.,Ltd.rep nih an sak mi a si. Hi lung Biakiin hunnak cu Rev. Van Tiam, Rev. Pa Mang, Pastor Thawng Tha, Pi Tum Ci le IGE Com.,Ltd.rep hna nih Ribbon an tan hnu ah Pu Henry Van Thio te chungkhar le UPC Founder Rev Dr. Ral Buai chungkhar hna nih Biakinn pi cu hunnak an tuah.
“Hi Lung Biakinn cu Pathian sin ah kan pekchanh, kanmah minthatnak le hmaihngalnak caah tuahmi a si hrim lo. A si sual ah cun Bawipa tu nih kan ngaithiam seh. Hika hmun a phan mi hna nih zalonnak, tihphannak in luatnak, sualnak chungin luatnak hmun ah cang hram seh. Hi biakinn muisam a kan suaipiak tu IGE Com.,Ltd.rep cung zong ah kaa lawm. Hi Lung Biak inn cu zei biakinn he hmanh aa lo lo. Kan ruahning bantuk tein a muisam an kan suaipiak. Cun hi biakinn cu cunglei in zoh tikah Vailam tah a cuang lai, inn chung Seeling zong Vailam tah a cuang lai, a hnulei a hmailei zong ah an cuang lai. Cucaah hi inn cu Vailam cung ah hram bunh in sakmi a si. Sullam ngei tein sak mi zong a si. Ka tuak tikah Vailam tah 8 a um. Cucu khuaruahhar a si nak pakhat zong a si” tiah Dr. Anna Sui Hluan nih biakinn hunnak tuah lio ah a chim.
Hi lung biakinn cu Vice President Pu Henry Van Thio a nu Pi Ngun Par philh lonak caah “Ngun Par Memorial United Pentecostal Church” ti min pek in sak mi a si. Tikir thar cu inn 60, inn chungkhar 80, minung 380 le Khrihfabu 3 an um tiah kan theih.
Photo: Salai Elvis @The Chinland Post
About The Author
