Tilian Ruang Ah Mizo Ram Inn 20 Nih Tlabung Khua An Chuahtak
Salai Ngun San Aung| 2018 June 12| Mizo ram ah June 10 zan thawk in cat loin ruah a surmi nih Lunglei district chung Bangladesh ramri ummi Tlabung khua inn 20 a hrawh i Aizawl le Lunglei kar lampi pathum a pit cang tiah kan theih.
“Ruah hi June 10 zan khan a tu tiang cat lo bak in a sur. Tlabung khua inn 20 a hrawh. Tlabung hi khuapi an si caah an inn dong zat cu ka hngal lo. Lunglei in Aizawl kalnak lam pi pathum a pit cang. Minung aa thliam khong le a thi mi an um hraw lo. Tlabung khua mi inn a rawk mi pawl cu YMA nih an zohkhenh hna” tiah Salai Valkim nih The Chinland Post ah a chim.
Hi khua le lam pawl lawng siloin min cim le ti chuak a tam chin caah tu bantuk in ruah a sur rih ko ahcun hi nak in harnak tam pi a tong rih ding dirhmun an sinak kong YMA nih an chim.
Aizawl le Lunglei kar kalnak lam hi min a cimh ruangah a pit mi a si i hi lam a cimmi pathum chung ahhin pakhat cu National Highway pi a si. Cun hmun dang ah lam a cim kho ding dirhmun le ti put a tam deuh nak tibantuk hmun cu mino le NGO pawl i bawm in a hmunka in an ven tiah kan theih.
Mizoram ramkulh chung, June 4 zankhat chung veve ah inncimhnak le motor lehnak in minung 21 an thi. June 4 zanlei suimilam 6:30 tluk ah ruah fakpi in a surmi ruang ah Mizoram ramkulh Lunglei khua, Lunglawn certual thlang minung 14 khua an saknak inn dothnih a cimh ruang ah minung 10 an thi tiah Khonumthung media cherhchan in kan theih.
About The Author
