Tilianh Ruang Ah Minung 113 An Thi Cang
The Chinland Post | 2024 September 16 — Tilianh ruang ah Myanmar ramchung minung 113 an thi cang i minung 64 an tlau, minung 14 an i hliam cang tiah SAC lei nih thawng an thanh.
Yagi thlichia le Bay of Bengal ah a cang mi thlitu ruang ah ruah fakpi in a sur i ti a lianhnak kong cu SAC lei chimphuannak nawl a ngeitu Zaw Min Htun nih September 15 ah a chim i cu chung ah a thi mi minung cazin pawl a telh chih hi a si. A tlau mi pawl zong kan kawl cuahmah lio hna a si tiah a chim fawn.
Taungoo hmunhma, Zayatgyi a hnulei khua, September 14 ah mi a chanh lio mi SAC ralkap pakhat le palek pakhat zong ti nih a fenh hna i an tlau tiah SAC lei nih a chim fawn.
Naypyidaw, Kayah ram, Bago ramṭhen, Magway ramṭhen, Mandalay ramṭhen, Irrawaddy ramṭhen, Karen ram, Mon ram le Shan ram tiah peng 56 ah ti a lian tiah SAC nih an chim.
Ti lianh ruang ah a rawk mi pawl dirh ṭhannak rian zong a rannak in kan tawlrel cuahmah lio tiah a chim.
Ti lianh ruang ah inn 72,900 leng, chungkhar 78,000 leng, minung 320,000 leng cu chikhat dornak hmun ah an ṭhial hna tiah SAC nih a chim.
About The Author
