Tint Tint Lwin Hotel Zone Riantuantu Ding Training Kaimi Zapi Certifecate An Pek Hna

Salai Elvis| 2018 August 7| July 26 in August 5 tiang Tint Tinh Myanmar Group of Companies nih Thantlang khua ah Hotel zone riantuantu ding cu a hlankan in Training pek an si hnu ah minung 84 cu Training dihnak Certificate an pek hna.

Training dihnak Certificate peknak cu August 7 TBC Hall ah ramkulh sipin vuanci U Soe Hthet tel in Thantlang khua cozah zung tuanvo ngeitu hna le khuanu/pa hna nih an tel pi hna.

“Zarh hnih chung Hotel riantuantu ding Training pek an si hnu ah inn sak aa lim tikah thlakhat training pek than an si rih lai. A tu lio ah cun hi Hotel zone saknak ding hmunhma phungning in kan hmuh khawhnak ding, cozah zung sin ah a herhmi ca tibantuk kan buai pi lio a si. Phungning in vawlei an kan pek tik hnu lawngah Hotel inn cu sak hram kan thok te lai. Hotel hi kum hnih tluk a caan pek in sak ding a si nain tutan Thantlang khua ah kan sak ding cu thla ruk chungah sak dih dingin kan suai sam cang. Hi hmun hma ah (teih-inn-puh) inn 30 tluk sak a si lai” tiah Project Director U Soe Win Maw nih TCP ah a chim.

Tutan training kaimi chungah minung pazeizat dah rianpek tak a si lai timi a fiang rih lo.

“Tutan training kaimi chungah an zapi tein rianpek an si lo hmanh ah an mah le inn chungkhar cio ah thathnemnak tampi an i chap lai, ih phah puan bil te hna, mi chawnhbiak ning le chumhchuan lei zongah that hnemnak tampi an i chap lai ka zumh” tiah tawlrel tu Pu Lawm Bik nih a chim.

Tutan training zarh hnih tluk an cawnnak chungah a bik in mi donning ningcang (Front Office), pawngkam humhimnak vengtu (Security), Housekeeping, chumhchuan ning (F&B), Kitchen le Waving pawl hna hi an si. Mah ni ah Training kai mi hna nih Lailam hmuhsaknak, hlasaknak le an cawnmi chungin hmuhsak nak zong an tuah hna tiah theih a si. +++