Tithiang Ngah Lo Ruangah Kum 5 Tang Ngakchia 30000 Leng Kumtin An Thi
Salai Aung Aung| 2018 July 17| Myanmar ram chung ah ti thiang lomi, zunput i daih lo ruang le ngandamnak he aa tlakmi luti tibantuk le hmunthur fimhlawmnak a um lo ruangah kum fatin te kum 5 tang ngakchia 30,000 leng an thi lengmang tiah WaterAid phu nih thawng an thanh.
Ram chung mi nuai 10 cu dinti thiang an hmang kho lo, nuai 11 cu zunput ngei loin an siaremnak paoh ah a zung mi an si i Myanmar ram chung minung 5 chungah pakhat hi ti thiang a hmang lomi le zunput a ngei lomi an si tiah an langhter.
Khuapi chung ummi minung panga ah pali nih hi ti thiang an hmang kho i pali chung ah pathum cu a thianghlim mi zunput an ngei nain khuate i khua a sa mi hna chungin ti thiang le zunput tha an ngeih loning hi zatuak in tuak tikah Asia ram chung ah a zualhma bik a si an ti.
Hi bantuk in a biapi mi thil ah herhbau in mizapi an ummi hi caansau a nguh dingmi a biapi innlo fek le tha pawl a um lo caah a si i hi herhbaunak phihkhar khawhnak dingah Myanmar cozah kan bawmh lai tiah WaterAid phu nih an website ah an tarlangh. .
Vawlei pi huap in minung nuai 844 hi ti thiang a hmang lomi an si i nuai thong 2.3 (2.3 Billion) hi ningcang tein hmunthur fimhlawmnak le tithur kal ternak tibantuk ngei loin khua a sa mi an si tiah an thawngthanhmi ah an telh. .
Ref: RFA Burmese
