Tlangcung hriamtlai hna nih mipi lei kan dir a hau: Dr. Sui Khar
The Chinland Post | 2022 April 4 – Cheukhat tlangcung hriamtlai pawl nih kaphnih karlak ah dir loin mipi kan dirpi hna le kahdohnak ah kan i tel a hau tiah Chin National Front (CNF) Vice Chairman Dr. Sui Khar nih a chim.
2022 March 20 ah a tlami kum 34 tlinnak Chin Miphun Dothlennak Ni conglomhnak puai ah Dr. Sui Khar nih onnak biatawi chimnak a ngeihmi video cu Chinland Information Center nih April 4 an a thlah.
“ Cheukhat tlangcung hriamtlai phu pawl cu atu kan ton cuahmahmi buainak he aa pehtlai lo bantuk in a karlak ah dir in chimrel lennak chacun mipi lei ah dir in raldo ve ding ah kan forhfial hna” tiah Dr. Sui Khar nih a chim.
A tulio caan hi, tlangcung hriamtlai phu pawl (EAOs), People Defense Force pawl (PDF) le National Unity Government (NUG) kan zapi tein hmunkhat ah ṭanṭiding caanṭha a si nain kan zapi kan i telkhawh dihding hi kan saduhthah a si nain ramkhel lei party pawl, tlangcung hriamtlai phu pawl an tuanbia, ramkhel lei an i fianning cungah an dirhmun a dannak hi a hlan in a tutiang a si cang tiah ramkhel lei thiamsang U Than Soe Naing nih a chim.
“A sikhawhnak bik in lungrual tein i teltum ding in kan nawl hna. Asinain, nan i teltum lo zongah kan in soi fawn hna lai lo. Tuanbia nih a mah le hmunhma te ah rian an kan pek ko lai timi zumhnak ka ngei” tiah a chim.
Ram pumpi kahdohnak minthut (NCA) ah min a thu lomi Ta’ang National Liberation Army (TNLA) zong hramhram uknak dohding le Federal Democracy ram serkhawhnak ding caah tiin kahdohnak a tuah cuahmah lio a si.
“Dothlennak phu ahcun kan dirhmun aa khat cio. Kahdohnak a chuak le chuak lo hi cu cheukhat phu pawl cu hmuitinh aa khat ko nain a derthawmnak, a ṭhawnnak tete a um cio” tiah TNLA Major Mine Aik Kyaw nih a chim.
Dr. Sui Khar biachimmi chungah tlangcung hriamtlai phu a simi CNF, KIA, KNPP, KNU le PDF hna cu hmunkhat te ah kahdohnak kan tuahṭi caah mipi thapeknak tling tein kan hmu tiah a chim.
Cun, tlangcung hriamtlai phu pawl le mipi hriamtlai phu pawl hna cu khuapi telh loin a dang hmunhma hna ahcun mipi uknak phung sersiam le dirh a si cang tiah a chim.
About The Author
