Tlangcung Miphun Party Hna He Hawikomh Pehtlaihnak Kan Tuah Lai; U Ko Ko Kyi

The Chinland Post| 2018 November 19| 88 Chanchuak Siangngakchia bu nih sermi Pyithu Party leikap in tlangcung miphun party hna he hawikomh pehtlaihnak kan tuah lai tiah Yangon i Pyithu Party zung hmunpi hunnak ah party haotu U Ko Ko Kyi nih media sin ah a chim.

“Pyithu Party cu rammi si paoh miphun thleidannak um lo, nu le pa thleidannak um lo, sinak dirhmun tlukruannak hi a hrampi suttung ah kan chiah. Cun, tlangcung miphun tlukruannak le federal ramkomh sernak hi party nih tlangcung mi hna he aa pehtlaimi a hrampi suttung an si. Cu pin ah riantuantu hna covo, lothlo hna covo, mino he aa pehtlaimi hna zong party i policy ah kan telh. Sipuazi he pehtlai in caansau a thangcho i tlukruannak tuanchuah ding pawl hi party i policy an si” tiah Pyithu Party haotu U Ko Ko Kyi nih a chim.

Pyithu Party zung hi ramkulh le ramthen kip ah arauh hlan ah an hun hna lai i mizapi nih an harnak an chimhmi paoh tawlrelpiaknak in an bawmhchanh hna lai.

Pyithu Party haotu chang a simi U Min Zeyar nih a tanglei bantuk in a chim.

“Tlangcung miphun aa tlukrualmi hawikomh pehtlaihnak hi fekte in kan ser khawh lawng ah tlangcung miphun pakhat le pakhat i zumhnak, i dawtnak hna le remdaihnak tawlrel tik zong ah a fekmi le hmual a ngeimi cawlcanghnak a chuak lai. Cu ruang ah Hiawkomh Pehtlaihnak hi minung theihnak men lawng in chimmi si lo in a dikfelmi hawikomh pehtlaihnak hi kan party nih ser khawh ding in kan i zuam lai”.

U Ko Ko Kyi zong nih hiti tlangcung miphun party hna he hawikomh pehtlaihnak tuahnak caah phunthum in kan then. Policy aa khatmi i fonh in riantuanti dingmi kongkau, thimnak (election) caan a phak tikah hawikomh pehtlaihnak sermi party karlah zeitindah kan i ceihruah lai i thimnak kan luh lai timi le hluttaw chung ah hluttaw palai pakhat le pakhat aa khatmi kongkau i fonh in riantuanti ding hi kan saduhthah le kan i hmaithlakmi a si tiah a chim.

Pyithu Party ah 8888 buainak ah hruaitu aa telmi siangngakchia lutlai U Ko Ko Kyi cu haotu, U Min Zeya cu haotu chang,, U Ye Naing Aung (Ku-wah) cu General Secretary,, Ko Maki le U Kyaw Kyaw Soe cu Joint Secretary an si.
Ref: RFA Burmese

Na ruahning rak langhter ve.. (Leave a comment)

%d bloggers like this: