Tlangcungmi Caholh Chimtu Hna Thla 7 Thlahlawh Caah Ks. 5 Billion Renglo An Chiahpiak Hna
City Hunter| 2018 Tho 11| Fimcawnnak ministry zung in a hrampi fimcawnnak zung tang ah a ummi tlangcungmi caholh a chimtu saya/mah hna ca thla 7 thlahlawh caah fimcawnnak budget in ks. 5 billion renglo cu fimcawnnak zung nih October 5 ah an chiahpiak cang hna.
Tlangcungi caholh chimtu saya/mah 23,846 caah thlakhat thlahlawh ks. 30,000 in 2018-19 budget kum thla 7 caah ks. 5 billion renglo cu ramthen le ramkulh fimcawnnak zung ah thenphawt dih an si cang.
“Kannih ahcun sianginn kip ah a si lo, a cheukhat sianginn ah tlangcungmi caholh chimtu saya/mah an um i anmah caah thlakhat ks. 30,000 in sianginn hun thawk khan kan pek cang hna” tiah Kayin ramkulh fimcawnnak zung lutlai pakhat nih a chim.
Tlangcung caholh chimtu saya/mah hna caah thlahlawh (riantuan man) cu ramkulh le ramthen fimcawnnak zung in pengzung ah thenphawtmi chawva hman tikah tese budget zulhphung ning le tawlrel ning le upadi ning in nan hman lai tiah a hrampi fimcawnnak zung nih October 5 nithla khenh nawlchuahmi ah an langhter chih.
Tlangcung miphun umnak sianginn ah rianpekmi tlangcung miphun saya/mah, tlangcung miphun caholh le nunphung committee hnatlaknak he caan cheuchum in rian pekmi tlangcung miphun hna nih tlangcung miphun caholh cu an cawnpiak hna. Fimcawnnak ministry zung budget in cachimtu caah riantuan man thlakhat ah ks. 30,000 cu 2014-15 fimcawnnak kum thawk in an pek hna.
2017-18 cacawn kum ah Mon ramkulh i sianginn cheukhat ah tlangcung miphun caholh chimtu cheukhat thlaruk tluk thlahlawh an hmu lo. 2015-16 cacawn kum ah tlangcung miphun caholh chimtu hna caah cozah bawmhnak an pek hna lo ruang ah Namkham peng fimcawnnak zung lutlai cu khuami nih duhlonak an langhter hnawh.
Tlangcung miphun kongkau ministry zung le fimcawnnak ministry zung tuaktaan ning in thlakhat ah ks. 30,000 a hmumi tlangcung miphun caholh chimtu saya/mah 5,000 renglo cu a luancia 2017-18 cacawn kum ah nica thlapek cachimtu saya/mah (Teaching Assistant) ah rianpek an si.
A niambik tangkua a awngmi kum 18-35 kar tlangcungmi 5,000 renglo cu nikhat ah riantuan man ks. 3,600 in rianpek an si.
Ref: 7Day News
About The Author
