Tlangzar Dirhmun: SAC nih Khua Mei khanghnak le Cawlcanghnak
Salai Mangpau | June 6, 2023 –
Tlangzar khua
Chinram Falam peng um mi Ramthlo khuakulh (ohsuh) chung tel Tlangzar khua hi Falam khua in Meng 20 hlatnak ah a um. Tlangzar khua he ramri a tlaimi khua hna cu, Nichuak lei ah Taal khua, Nitlak lei Ramthlo khua, Thlanglei ah Rulbu khua le Hrianghnang khua hna an si.
Tlangzar khua cu (1957) kum ah Pu Hram Taung, Pu Tial Ci le Pu Lian Ram hna nih an tlak. November, 2021 kum tiang ah Inndong 92 le pa milu 193, Nu milu 208 an dihlak fonh 401 an um.
Khua ah Ralhrang an lut
SAC nih hramhram in uknak an laknak 2021 kum in 2023 kum tiang ah ralhrang nih mei khangh in a hrawh mi Tlangzar khua cu a tanglei bantuk in ka vun langhter lai.
- 21.7.2021-25.7.2021 ni 5 tiang ah hin Kalaymyo in ralhrang 150 cu Tlangzar khua ah hmun an lak i sualnak ngei lo khuami an tlaih an hren hna hlei ah duhpaoh in khuachung ah hriamngan le meithal an thlah.
- 13.10. 2021 ni ah Kalaymyo in Ralhrang 50 cu Tank motor 2 he an rak kai than. Khua an phan hlan khua pawngkam ah hriamngan in an kah. Mah ni ah Hakha in a kir mi Tanks motor 2 le Ralhrang motor 56 khuachung an luh i ni 3 an riak.
- 2.5.2022- 5.5.2022 ni 2 chung ah Hakha in a kir mi Tank 2 le ralhrang motor 26 cu khuachung an lut than. Inn tampi mei an khangh. 2023 March 7 ah Kalay in Chin ramkulh khualipi lei ah ralkap thazaang 200 leng he a rak kai mi cu April zarh khatnak ah Tlangzar an lut. Chinland ralkap hna kut in an thih, hma an put lawng siloin an thil phortu motor pawl le an raltuknak tank (Armor vehicle) pahnih tiang hrawhpiak dih an si.
Sualnak ngei lo Mipi a hren
SAC ralhrang rual an kainak lamkam ummi khua paoh ah Mipi umnak innchung lut in thilri an fir. Mipi tlaih in an hren, an velh hna. 21.7.2021 ni Tlangzar an lut lio ah mipi 2 an tlaih mi hna cu 23.7.2021 ni ah an luat. Tlaih a ton mi 2 cu CDF/CNA chungtel na si maw? A si lo ah anmah bu he pehtlainak nan ngei maw? tiah tihor kuang ah it ter in hren in an velh hna hnu ah an thlah than hna.
Thilri an fir
Tlangzar khua ah SAC ralhrang an um lio ah an fir mi: Hrukaih thilri, Sehthilri, Biakinn chung hmangmi thilri, Innzuat satil an thah an ei i an duh mi thilri an lak i motor in Kalaymyo lei an tlung pi.
Mei khangh Mi
4.5.2022 ni ah Hakha in a hun kir mi Ralhrang motor 26 le Tank motor 2 khuachung an riak. 5.5.2022 zing 8:15 in Inn 17 mei an khangh. Hriamngan le hriamhme in khuachung an kah ruangah inn a rawk mi a tam ngai.
Tlangzar hi a voi thumnak an khangh cang. Voi khatnak ah inn 17 an khangh i voi hnihnak ah inn 4, voi thumnak ah inn 7 an khangh. Thilri chiahnak thlam he telh ahcun inn 8 an khangh. Inn 28 an khangh cang.
2023 April ni 3, ah Tlangzar khua a khangtu SAC ralkap hna cu Chin ralkap nih Sniper in an kah hna caah ralkap 5 hrawng an thi.
2023 April 5 Tlangzar khua pawng kahdohnak ah SAC ralkap pawl cu hmai fong ngam ti lo in an um caah vanlei raltuknak an cah i minutes 15 chung hrawng MI35 helicopter in Chin ralkap an kah hna. Bomb voi 12 hrawng a thlak.
Theihternak: Runvennak le humhimnak ruah ah chimtu le thawnglaknak kan langhter lo.
