Tlianh Ruang Ah A Thi Mi An Karh
The Chinland Post | 2024 September 17 — Atulio Myanmar ramchung ah a cang cuahmah mi tilianhnak ruang ah September 16 zaanlei tiang an khawmhsuat khawh mi cazin ning ahcun peng 56 in mipi 226 an thi cang i a tlau mi 77 an um cang tiah SAC lei thawnzamh nih an langhter.
Na, caw telh in saṭil a thi mi 120,000 leng an um cang i facang le lo acres 640,000 leng a hrawk cang i mipi inn 2,000 leng a rawk cang, mipi inn 150,000 leng ti nih a chilh cang tiah an langhter.
Nithum chung ah SAC nih a thanh mi cazin ning ah tlianh ruang ah a thi mi, a tlau mi cazin hi a karh lengmang kha hmuh khawh a si i umkalnak a ṭhat lo ruang, phone line a tlau ruang ah cazin lak khawh lo nak hmun pawl zong an um rih i a thi mi le a tlau mi cazin hi an karh thluahmah rih lai tiah an ṭial.
SAC cazin ning ah September 14 zaanlei tiang a thi mi 113, a tlau mi 64 le aa hliam mi 14 an um i September 15 zaanlei ah a thi mi 172 le a tlau mi 38 tiang an karh tiah theih a si.
South China Sea ah a cang mi Typhoon Yagi thlichia ruang ah Myanmar ramchung ah ruah a fak i Naypyidaw, Karenni ram, Karen ram, Chin ram, Bago ramṭhen, Magway ramṭhen, Shan ram le Irrawaddy ramṭhen hna ah tilianh le min cimhnak a chuak i mipi a sing in an den hna.
About The Author
