Tonzang Pengah La Rungrul Zuatnak An Tuah Lai

TCP-Hakha|2019October 7| Chin ramkulh Tonzang pengah hlan lio i rak tlamtlinh mi la sernak rungrul (Pu La) zuatnak rian cu a thar in tuah than an timh. A nikhua caan le vawlei sining zoh tik ah tlamtlinnak kan hmuh ko lai tiin zumhnak kan ngei tiah U Suan Lian Pau nih a chim.

“Tonzangpeng ah cun Bing cin mi le cozah rian tuanmi dah ti lo cun tangka hmuhnak lam a ngei mi ho hmanh a um lo. Hlan lio ah hin Tonzang peng ah Pu-rungrul zuatnak rian hi rak tlamtlinh mi zong a si caah tubantuk in mah le tangka cio thawh in Tuluk ram ah rungrul ci le rungrul eimi thingkung ci kan lak hna i ni kum in vawlei Ekah 3 ah rungrul zuatnak kan tuah cang” tiah U Suan Lian Pau nih a chim.

“Japan le Thailand zong ah rungrul zuat ning le zuar ning kan va zohfel tik ah zuarnak lei zong ah harnak zeihmanh a um lo. Business lei in kan tuah mi a si lo, Tonzang peng ah hlan liopi in rak tlamtlinh mi a si cang caah zapi nih tuah cio ve hna seh ti kan duh caah tubantuk in a thar in kan vun tuah than hi a si” tiah a chim chap.

Tonzang pengah rungrul zuatnak rian cu thilman a kai tuk caah an hmuh mi tangka an i kaih lo ruang, cozah nih rungrul umnak inn cawk piak ti lo ruang le rungrul zuatnak inn a umti lo ruang ah 2015 thawk in rungrul zuatnak rian cu an i din tiah kan theih.

“Chin ramkulh cozah lei nih rungrul zuatnak konghe pehtlai in Tender an auh, mah vialte cu Tedim lawng ah a si. Tedim ah an tuah mi hi fiang tein chim ko ah cun Tedim ah khua caan ning in kumkhat ah voikhat lawng zuat khawh an si. Tonzang ah cun rak tuah bal cang mi a si caah cozah lei nih kan bawm hna seh law zei tluk in dah a that lai. Tonzang ah 1975 kum thawk in rak tlamtlinh cang mi a si, a sinain cozah lei nih tha tein an bawmh khawh hna lo caah an rak ngol hi a si. Tonzang ah hin khuacaan in siseh vawlei lei in siseh a that biknak hmun a si caah cozah lei nih kan bawm kho hna seh ti hi ka duh” tiah U Suan Lian Pau nih a chim. (Ref.CW)

Leave a Commnet

%d bloggers like this: