Trump Nih US Biaceih Bawizik Caah Brett Kavanaugh A Chuahpi
Salai Aung Aung| 2018 July 10| US president Donald Trump nih cacawn nikhat zan ah khan US biaceih zung sangbik i lutlai Anthony Kennedy airawl ah Kavanaugh min a chuah pi cang.
Brett Kavanaugh hi kum 53 a si i Donald Trump nih President a tuan thla 18 ah biaceih bawizik i a thim hi a si.
Kavanaugh cu Senate ah thimfum thlak in fehter nak tuah a si rih lai. Senate ahhin Trump a tanhmi Republican minung an tlawm deuh ngai caah thil har ngai si dawh in a um. An fehter asi ahcun June 27 ah dinhnak kong a thanhmi biaceih bawizik hlun kum 81 a si cang mi Kennedy rian a chan lai.
“Hi pa hi fiang te le hmual ngei ngai in ca tial thiam nak he mi mak pakhat a si. Nihin kan chan ahhin vawlei pi huap zong in a thianghlim bik le a har bik lungput ningcang tha ngei mi a si. Cun biaceih bawi Gorsuch bantuk in Kennedy ca zong ah rinhchan tlak cazi pakhat a si” tiah Trump nih a chuahpi mi pa rian khinh a tlaknak kong a chim.
Kavanaugh hi 2006 thawk in Columbia pengkomh biaceihnak zung ah min ngei ngai in rian a tuan cang mi a si.
“Biaceihnak ka kalpi ning cu dengteo tein hmai ah a kal: Biaceihtu cu hohmanh nih hip loin a zalong mi le upadi sullam a fianhtu a si awk a si, upadi a sertu si awk si lo. Biaceihtu nih cun hluttaw nih an fehter mi upadi kha aa tial ning tein sullam a leh awk si. Cun biaceihtu nih cun phunghram pi kha aa tial ning tein a sullam a leh awk a si, tuanbia a hngalh awk a si, cun pupa chan thil sining le a chan chan in kal pi mi sining kha a hngalmi a si awk a si” tiah Kavanaugh nih a chim.
Conservative lei minung pawl nih cun Kavanaugh hi nau hrawh nak kong le a dang ah a ruahning le zeitluk in zatlang bu sersiamnak lei ah pum aa pek timi kongah biahalnak tampi an tuah len. Asinain amah a tanhtu pawl nih cun hmuhtonnak a ngeih mi le phungphai lei kongah a ruahnak kha biapi in an dirpi ve.
Ref: Aljazeera
