Tuh Ning Te In Zuun Cio A Si Te Lai
The Chinland Post| 2019 February 11| 1. Hintarah Ngiangdun tlanglawng lamsernak i leikuang ekah 200 chuhmi caah Ks. sing 7300 acozah nih a liamh hna. Hi liamhmi hi ekah pakhat ah ks. sing 18 ca in a si i dum hau le inn hrawhpiakmi hna zong liamh chih a si tiah Zalon peng khuabawi U Kyaw Naing Lwin nih a chim. Hi liamhmi tangka cu Ayeyarwaddy remthen Chief Minister le a kuttang nih June 21, 2016 ah tuanvo ngeitu kut ah an pek hna.
2. Panglong conference 2018 remdaihnak cathluan dal 2nak; rammi zapi he pehtlai in zulh awk a simi ziaza, dingrep hna a hme (f)nak, catlap number 44 ah rammi hna i an loram a si komi kha hranhram in chuhnak le i laaknak tuah hlah.
3. Pyidawngsuh Tamahdah Kawlram lei ngei le vawlei dang chuhmi hna an remh thannak phungphai le riantuannak March 21, 2018 chuhmi vawlei a ngeitu sin ah rianrang te in a phanh awk riantuannak a ngan 9, a hme number 9 le 10nak chung ah Pyidaungsuh acozah nih an hnatlakpi cangmi zulh awk le tuahawk ah an timi number 9 chung ah a ummi cu; khua kauhnak le seh riantuannak ah vawlei chuhnak bia hna kha ramthen, ramkulh acozah bu nih thithruai in tuannak nawl a hmutu company le lothlo, vawlei ngeitu buthum komh hnatlaknak in company le lothlo an pahnihte in sunghfahnak um lo in tuan awk. A hme 10nak ah upadi lo in chuh i tuannak nawl ngeitu he komh in Lahnah (39) me cazin pungsan (105), lei le lo tuannak lethmah pungsan 7 in hmuhlaaknak kha ramkulh, ramthen acozah hna nih hrawhnak nawlchuah in an chuhmi hna lothlo kut ah peknak tuah awk tiin a um. Hi a cunglei nawlngeitu acozah nih an chuah i an tawlrel cangmi zulhawk phunglam vialte hi Chin ramkulh caah a si ve ko ahcun Chin ramkulh cozah nih an tuahtuanmi ah;
1. Khuathar hmunrawp lo hmun le lei ngeimi hna he buaibainak
2. Hlan cozah kut in pekciami hmun le inn vialte theh i dantatnak
3. Pupa ram chung ah dum hau tuahmi vialte hrawhpiak dihnak
Democracy phung ning ahcun mizapi duhmi mizapi nih thimmi, mizapi nih thiltha, thilfek, thildik in i ukhruainak hna hi an si. Chin ramkulh NLD cozah an can hnu in an tuahtuanmi ah mizapi nih duhlonak langhternak uihnih a si cang. Zawh than timhmi he cun voithum a si cang lai. Philh khawh lo in rosung ah a rung cang zungzal lai.
1. Khuathar hmunrawp innhmun pekmi he pehtlai in kum 2017 in 2019 nihin ni tiang ah inntung a dir lo. Sullam ngeih dawh a si tiin ka ruah.
2. Inn an thehtermi hna innhmun ah mingei pawl inn a dir tiah thehpiak a tongmi nih an chimtial cangmi hna hi a dik taktak a si ahcun rammi thatnak caah si lo in mah pumpak tlorthaunak tu ah a cang ti awk a si.
3. Nawi lamkauhmi ah company le mingei mirum miphun dang mi hna nih innhmun an i hamnak le thingah cia vuanci pakhat pa innsaknak ah tiin an chuahmi hna hmuh tikah sifak santlai lo, mizapi thathnemnak ca si lo in santlailo sifak mitthli luannak le pakhuainak rian titu in mitthlam ah a cuang. NLD hruaitu bik Suu Kyi nih cozah, ralkap, tlangcungmi buthum komh in Panglong conference ceih i biachahmi hi upadi asilo zong ah an chah cangmi bia cu Chinram cozah nih zulh le tuahtuan awk asi hrimhrim ko. Democracy dik taktak cu mi ngaihchiatter rian a tuan bal lo. Mi chawva thilri hranhram in a chut, a hrawk bal fawn lo. Democracy lubik Suu Kyi nih rammi caah harnak chuahpitu si lo kha Democracy uknak ahcun biapi taktak a si a ti. Democracy le pupa ram hi aa then kho lomi phunglam phung in nunphung zong asi chih fawn. Chin ramkulh NLD cozah nih Democracy ram ah pupa ram a um lo an timi hi phungdik a hngalmi le democracy caah a nunnak tiang pek a ngamhmi nih pupa ram a um ko a ti. Democracy ning lo in salu lawng co a duhmi nih a um lo an timi cu tihnung bia a si. Ralkap cozah lio bang nawlngeihnak lawng hmang in riantuan cu a hmun i chansau pi tiang hngalh camcin an si. Phungning canglo in mi va lawmhter zong hi caantawi te ca lawng a si. Sifak santlailo namneh le mitthli tlakter cu techin fapar tiang in theipar hi an zuun tawn.
“Nemnem nih chawtha hlawh” Pupa biaro sung a si. Nunphung, bia le hla, ca le holh, khuasak tintuknak aa hrawm aa khatmi nan Lai hawi te hi sa le ral, tupung, damiah, cozah dotu, hrawktu an si hin lo. Kan pupa phungthluk ah mithah lainawnnak hmanh zuupu khat in a dai an rak ti. Cu ve bang in lo le dum ngeitu, ram ngeitu hna kha phungningte in chimh le ruahti ahcun Hakha khuathat le dawh a duh ciomi an si ko. Zaukphung ningte in chimh le ruah, peek le chanh he khaanti tuahti ahcun kaphnih thinlung aa khat, aa rem ko lai. Thiangchiat le ngaihchiatnak hi an luangti hin lai lo. USDP cozah hmanh kha an pa keneh an zul lo. Thangchiat lai ral an rak tih tuk, a tlari te in rian an rak tuan.
Kan cathiang chung ah na tuh bang in na zuun lai ti le na biachimmi theitlai na co lai ti a si caah aho paoh kan tuhningte in kan zuun cio te lai. Kan tuhmi le kan chimmi cu kan tuh ningte in zuun cio a si te lai caah kanmah chanchung ca lawng si lo in kan tefa chan tiang ruahpiak a hau. Kan thinlung put ningte in tuahtuanmi kha kan thih hnu ah mi nih an kan ceih, an kan phai cio ve te lai. Bawipa Pathian le minung mithmuh ah thilding, thiltha tuah cio awk tu kan si.
Pu Khua Kung
Hakha, Khuahlun
About The Author
