Tukum CACC Award Cu Dr. Salai Lian Hmung Sakhong An Pek

Salai CungCung|2019 April 4| Avoi 22nak CACC BM tonpumhnak cu Gangaw peng Oakhla Baptist Church ah an tuah i Dr. Lian Hmung Sakhong cu CACC award an pek tiah theih a si.

“CACC award cu kumkhat voikhat minung pakhat thim in kan pek hna. CACC hi biaknak lei riantuantu kan si ko nain biaknak lei papek in award kan pe hna lo. Ramkhel lei, zatlang nunphung lei, ca tial lei tibantuk a phunphun in kan pek hna. CACC award kan pek ning cu a kum zoh in kan pek hna. Tukum ah ramkhel lei kan pek ah cun hmaikum lei ah biaknak asilole catial lei, zatlang nunphung lei tibantuk kan pek hna. Tukum hi tonpumhnak kan tuah i ramkhel lei pek siseh kan ti caah ramkhel lei minung kan thim hna i Dr. Lian Hmung Sakhong kan pek hi a si, laksawng cu trophy le ks. sing 10 (1,000,000) a si” tiah CACC, GS Rev. Za That nih The Chinland Post ah a chim.

“Hi award kan pekmi hna cu ramchung ramleng Lai holh hmang mi CACC he aa pehtlai mi vialte chung in an riantuannak le ram le miphun caah bochan awk tlakmi tiin thim mi an si caah mi sawhsawh an si lo ram le miphun caah pasal tha an si.  Miphun huap in award hi pek an si nain Nu hi thimding in ruah an si ko nain atu tiang ah kan pekmi hna an um rih lo. Kan pa le pawl he an riantuan ning kan zoh tikah kan pa le hi an thazaang a that deuh caah kan pa le lawng tu tiang ah cun kan pek khawh rih hna. Nu hi i pe ve ko seh kan ti nain kan pa le level in kan zoh tikah a tlamtling deuh lo. Hmaikum hi zeibantuk kan pek hna lai timi cu a fiang rih lo, tonpumhnak ngeih dih hnu lawng in a fiangte lai” tiah a chim chap.

Hi CACC award cu 2015 kum khan pek hram an thawk. 2015 kum ah Sayagyi Dr. Bawi Hu, 2016 kum ah Pu Lian Uk, 2017 kum ah Rev. Dr. C. Duh Kam,  2018 kum ah Pu Stephen Ni Kio, 2019 kum ah Dr. Lian Hmung Sakhong an pek tiah kan theih.