Tukum Chin Miphun Ni Ah Chin Ramkulh Hluttaw Zungthar Hunnak An Tuah Lai

Tawk Tling Thang| 2019 January 16| Chin ramkulh khualipi Hakha khuapi chung ah sak cuahmah liomi Chin ramkulh hluttaw zungthar cu a ralaimi February 20, Chin Miphun Ni ah sunglawi ngai in an tuah lai tiah kan theih.

Hi kong he pehtlai in Chin ramkulh hluttaw Speaker Pu Zo Bawi nih atu bantuk in The Chinland Post ah a chim.

“Chin ramkulh hluttaw zungthar cu a ralaimi February 20 zing, Chin Miphun Ni ah sunglawi ngai in kan tuah lai. Cun, a pawng ah Hluttaw guest house zong a pawngte ah kan sak chih. Hluttaw zung he hluttaw guest house he a zapi ks. 6 billion renglo a dih. Hluttaw guest house tu cu a ralaimi January 31 ah hunnak kan tuah lai”.

“Hluttaw zungthar hunnak kan tuah dih cangka in zungthar ah kan i thial dih colh lai. Zungthar ahcun media corner kan tuahp chih caah hluttaw meeting tuah tikah zalongte in media pawl thawng nan la kho cang lai. Tukum Chin Miphun Ni hman ding in rampi President le ramkomh minister hna le Amyotha hluttaw le Pyithu hluttaw speaker le a bawmtu pawl zong sawm kan timh hna. President lakah hin President U Win Myint a rat ding kan zumh. Khuallian a rami hna nih hluttaw zungpi cu hunnak an tuah te lai” tiah Hluttaw Speaker Pu Zo Bawi nih a biapeh ah a chimchih.

NLD cozah thar a kai hnu in Chin ramkulh hluttaw nih upadi 8 le ni-upadi 4 an fehter cang tiah kan theih. Chin ramkulh hluttaw palai hi ralkap palai minung 5 telhchih in an zapi minung 24 an si.

Na ruahning rak langhter ve.. (Leave a comment)

%d bloggers like this: