Tukum Chin Miphun Ni Hakha Rang Cit Zuamnak Pakhatnak Laksawng Ks. 200,000 A Si Lai
![](https://i0.wp.com/thechinlandpost.info/wp-content/uploads/2019/02/15_0914_KentuckyDowns_ww-9370-L.jpg?fit=640%2C428&ssl=1)
Horses making the turn into the homestretch at Kentucky Downs.
Salai Cung Cung|2019 February 15| The Hakha Post tawlrelnak in kum 71nak Chin Miphun Ni, Hakha ah Rang cit zuamnak an tuah lai tiah kan theih.
“Hi rang cit zuamnak cu phunthum in kan then. A pakhatnak ah Kawl kal tlik zuamnak, apahnihnak ah Phawhhnih duhchung tlik zuamnak, apathumnak ah Rang dawh bik zuamnak an si. Kawl kal le Phawhhnih zuamnak ah a phunhnih ning in laksawng pakhatnak in pathumnak tiang kan pek hna lai. Cun rang aa dawh bik mi pakhat kan thim lai i laksawng kan pek lai. Aa zuam ding mi minung hi rikhiah a um lo tiah” The Hakha Post Editor in Charge- Za Biak Thawng nih The Chinland Post ah a chim.
“Tu tiang ah aa zuam ding hi committee sin kan theih ning ah cun minung 10 hrawng hi an i zuam ko men ti kan ruah. Laksawng pawl le bawmhmi pawl cu committee tonpumhnak kan ngeih than hnu in a fiang te lai. Hi rang cit zuamnak cu hlan ah an rak tuah nain tu hi an tuah lonak a sau ngai caah kanmah The Hakha Post nih tu hi avoi 1nak tuah kan timh hi a si. The Hakha Post nih Chin Miphun Ni ah thil pakhat khat tuah kan i zuam peng ve i tukum zong Rang cit zuamnak tuah kan i timh hi a si. Hmailei zong kan tlamtlin ah cun pehzulh ding in timhtuahnak kan ngei ko” tiah a chim chap.
Laksawng an sermi le an pek dingmi zat hna cu;
A. Kawl Kal
- Pakhatnak : ks. 200,000
- Pahnihnak: ks. 100,000
- Pathumhnak: ks. 50,000
B. Phawhhnih
- Pakhatnak : ks. 200,000
- Pahnihnak: ks. 100,000
- Pathumhnak: ks. 50,000
C. Rang Dawhbik hi ks. 50,000 pek a si lai tiah kan theih.
“Rang cit hi Lai nunphung lawng a si lo nain Laimi zong nih kan rak ngeih ve mi a si. Cu caah mah pawl hi vun tharchuah than kan timhtuah. Rang ngeimi paoh nih miphun dawtnak lungthin he rak i zuam cio usih law hmailei tiang pehzulh kho ding in nunphung pakhat bantuk a si ve caah” tiah a chim.
Hi Rang cit zuamnak ah pumpak in laksawng pek khawh a si. Cun Pakhatnak in Pathumnak tiang laksawng pek a um leng ah aa zuammi dihlak laksawng pek a si lai. Aa zuammi Rang dihlak chung in aa dawh bik Rang pakhat thim in laksawng pek a si lai tiah tuanvo ngeitu sin in kan theih.