Tukum Chinram Tanghra Result Nih Nikum Result A Lonh Kho Lai Maw?

0

Salai Holy Tawk Tling Thang| 2018 June 1| 2017-18 cacawn kum Myanmar rampi tanghra camipuai sungh/awn result cu thaizing (June 2) ah an thanhchuah cang lai. A luancia kum 12 chung, Chin ramkulh ah tanghra sunghnak a that bik kum cu nikum (2017 kum) kha a si. Tukum Chinram tanghra camipuai result nih nikum result a lonh kho lai maw?

2017 Kum Tanghra Result Cuanhthannak
2017 kum Myanmar ram pumpi ah tanghra a phimi zapi hi 716188 an si. Hi chung ah a awngmi zapi 242736 an si, zatuak in 33.89% an si. 2017 kum Myanmar ram pumpi ah 6D (Distinction) a hmutu zapi 809 an si. 5D a hmutu zapi hi 1876 an si. 4D a hmutu zapi hi 3676 an si. 3D a hmutu zapi hi 5366 an si. 2D a hmutu zapi hi 8859 an si. 1D a hmutu zapi hi 36134 an si.

2017 kum zatuak in tanghra camipuai sungh/awn a tha bikmi cu; zatuak 41.12% in Mon ramkulh an si. A changtu cu zatuak 40.22% in Mandalay ramthen an si. Sungh/awn result a chia bikmi cu; zatuak 17.16% in Rakhine ramkulh an si. A changtu cu 19.04% in Chin ramkulh kan si. A luancia kum 15 chung vialte Myanmar rampi tanghra result zoh tikah sunghnak a chia bik zungzal cu Chin ramkulh kan si. Nikum Rakhine ramkulh result a chiatnak bik a ruang cu Rakhine ramkulh buainak ruang ah a si kan ti khawh. Asi ahcun tukum tah sungh/awn result a chia bikmi ramkulh in kan luat kho rih lai ti na zum maw?

2017 Kum Chin Ramkulh Tanghra Result
2017 kum Chin ramkulh in tanghra camipuai a phitu zapi hi 9725 an si, hi chung ah 1852 (zatuak 19.04%) an awng. 2017 kum Chin ramkulh pengkip in tanghra sungh/awn result zatuak in a tha bikmi cu; 25.99% in Hakha peng a si. A changtu cu zatuak 24.79% in Kanpetlet peng an si. Pengkip in Distinction tambik a hmutu cu Tedim peng an si, minung 66 nih an hmuh. A changtu cu Falam peng an si, minung 31 nih an hmuh. Tukum tah zei peng dah result tha bik le Distinction tambik hmutu an si te hnga?

2017 kum Chin ramkulh pengkip in sungh/awn result a chia bikmi cu; zatuak 8.19% in Paletwa an si. A changtu cu zatuak 9.72% in Tonzang peng an si. 2017 kum Chin ramkulh in 4D a hmutu peng hna cu; Hakha in pakhat, Mindat in pakhat, Tedim in pakhat le Falam in minung an si. Tukum tah zei peng dah result a chia bik te hnga i Distinction sang bik hmutu hi zei peng (township) dah an si te hnga?

A Luancia Kum 12 Chung Tanghra Result
A luancia kum 12 chung Chin ramkulh tanghra camipuai result kan zoh than tikah 2017 kum hi sungh/awn result a that bik kum a si. 9,725 an phi i 1852 (19.04%) an awng. 2006 in 2016 tiang Chin ramkulh tanghra sungh/awn result cuanh than tikah camipuai a awngmi zatuak 19% an phan bal lo. Tukum tah nikum nakin maw a that deuh lai, a chia deuh hnga dah?

Chinram Tanghra Result A Tha Bik Kum
Chin ramkulh i tanghra awngmi zatuak a that bik hna kum cu; 1986 kum zatuak 22.78%, 1988 kum ah zatuak 29.28%, 1990 kum ah zatuak 38.07%, 1993 km ah zatuak 30.4%, 1994 kum ah zatuak 32.82%, 1995 kum ah zatuak 24.32%, 1997 kum ah zatuak 28.7%, 1998 kum ah zatuak 48.35%, 1999 kum ah zatuak 20.77, 2003 kum ah zatuak 20.39%, 2004 kum ah zatuak 24.70% le 2005 kum ah zatuak 30.04% an si. Chinram ah tanghra sungh/awn result a that bik kum cu Hakha ah Myanmar rampi dirhmun in Siangngakchia Puai (cawng-ta-puai-daw) tuah kum 1998 lio a si, zatuak 48.35% an rak awng. Tukum hi zatuak % zeizat dah a phan lai tiah nan ruahdamh cio?

Kumhnih Chung Chinmi Chung In 6D A Hmutu
The Chinland Post nih kan hngalh khawh tawk ah 2016 kum ah 6D a hmutu hi minung 9 an si. Asinain 2017 kum ahcun minung 5 lawng an si. Tukum tah nikum nakin maw a that deuh lai, a chia deuh lai dah?

2018 Kum Tanghra Camipuai Phimi
2018 kum Myanmar ram pumpi in tanghra camipuai a phi taktakmi zapi hi 788,863 an si, camipuai phit lo in a baumi 55495 an si. Hi chung ah Chin ramkulh in a phi taktakmi zapi hi 10167 an si, phit lo in a baumi zapi hi 1576 an si. Myanmar ramchung vialte lakah Chin ramkulh in tanghra camipuai a phimi zatuak hi 86.59% in an tlawm bik. A chang tu ah Rakhine ramkulh an si, 87.78% lawng nih camipuai an phit i a phi lomi hi 5453 an si.

Tukum Hi Camipuai Phitu An Tamdeuh
Chin ramkulh in 2017 kum tanghra camipuai a phimi nakin tukum (2018) hi siangngakchia 442 in an tam deuh. Nangtah, Tanghra  awngmi zeitluk in dah an tam deuh lai ti na ruah?

2018 Kum Ah Zei Subject Dah A Har?
2018 kum tanghra camipuai ah Chin siangngakchia tampi nih an phit khawh lo bikmi cu English subject a si. English hi a question hrimhrim a har. Hi ruang ah siangngakchia tampi an thin a phang. Sihmanhsehlaw, a kum fatin ti awk in subject pakhat paoh hi cu a har peng ko caah Chin siangngakchia tamdeuh an sung hlei lai ti ka zum lo. Amah belte, siangngakchia tampi an mark hmuhmi zapi fonh a tlawmter deuh khawh ve.

2018 Hi Result A Tha Deuh Lai Maw?
Chin ramkulh dirhmun in kan tuak ahcun 2018 kum hi tanghra result a tha deuh lai tiah ka ruah. Zei ruang ah ti ahcun cozah nih siangcachimtu saya/sayamah tampi a hun a kan pekchap ruang ah siseh, Siangcachimtu saya/sayamah biatakte in training a pek deuh hna ruang ah siseh, cachimh ning le cacawnnak a hun i thlen deuh ruang ah siseh, zaukphung lamthluan hoih deuh in sayate nih siangngakchia ca an chimh deuh hna ruang ah siseh, siangngakchia tampi zong mah lungthote le ca zuam duhnak lungput an ngeih deuh cang ruang ahhin nikum nakin result a tha deuh lai ti ka zumh.

Biatlang Komnak
A si fak bikmi ramkulh, lam le sul a chia bikmi ramkulh, university a ngei rih lomi ramkulh kan sinak in kan luat khawhnak ding ah tukum Chin ramkulh tanghra result hi kum dang nakin tha deuh hraam seh. Ca a thiam (a qualified) taktakmi siangngakchia tampi chuak hraam hna seh, marksang (Distinction) 6D, 5D tibantuk a hmutu siangngakchia tampi chuak hraam hna seh. Chin ramkulh lawng ah si lo in ramkulh le ramthen dang ah tanghra camipuai a phimi Chin siangngakchia tampi zong nih awnnak le marksang (distinction) tampi kan hmuhpiak hraam hna seh.

June 2 ah zingka suimilam 6:00 ah Myanmar ram fimcawnnak ministry zung website a simi www.moe.gov.mm ah siseh, Myanmar ram cacheknak zung website a simi www.myanmarexam.org zongah Myanmar ram pumpi tanghra result zoh khawh a si lai.

Ref: The Chinland Post Newspaper

2018 June 1 | 5:00pm|
Hakha, Chin State

About The Author

Na ruahning rak langhter ve.. (Leave a comment)

%d bloggers like this: