Tukum Chungah Thantlang District Believers Church Biakinn Thar 6 Hunnak An Tuah Lai

Salai Elvis| 2019 January 17| 2019 kumkhat chung ah Believers Church Thantlang District chungin Biakinn thar 6 Pathian sin pekchanhnak an tuah lai tiah District Chairman sin in kan theih.

Biakinn thar Khua 6 ah hunnak tuah dingmi hna cu; Lungding, Tlangpi, Sihhmuh, Thangzang, Hriangkhan le Belhar khua an si. Hi biakinn thar hunnak tuah dingmi chungah tlakrawh inn 4 (Lungding, Tlangpi, Hriangkhan le Thangzang) an si i Thinginn (Sihhmuh khua) le Korea camphio inn (Belhar khua) an si.

“2019 kum chungah biakinn 6 cu hunnak tuahdingin timhtuahnak kan ngei. A ni caan tu cu a fiang rih lo. National Bishop Dr. CK No Chum nih caan a suaisam te lai. Hi biakinn hunnak ah hin amah National Bishop a tlun khawh lo hmanh ah a fapa LC Thawng Tha Thang nih a tuah te ko lai. Anmah Pa fa pakhat paoh an si te lai” tiah District Chairman Rev. F Thang Vung nih The Chinland Post ah a chim.

Biakinn thar sakmi pawl cu National Bishop Dr. CK No Chum nih nih tawlrelpiak mal thawng in sakmi deuh an si tiah kan theih.

“Biakinn saknak caah National Bishop nih a herhmi Fund kawlpiak, amah kutritnak le tawlrelpiaknak thawng in sak an si. Khuami tu hi thazaang le nihlawh deuh in an tang ve” tiah a cunglei upa nih a chim.

2019 kum chungah Believers Church Thantlang District chungin Biakinn thar 6 hunnak an tuah lai pin ah tukum chung lila ah Biakinn thar khuali; Farrawn, Vambai, Ruabuk le Tluangram (sangpichung) ah an sak rih lai tiah kan theih.

Thantlang peng khua 85 chungah khua 21 ah Believers Church (Khrihfabu) an um i Thantlang District chungin Khrihfabu chungtel 3,800 tluk an um tiah kan theih.

Na ruahning rak langhter ve.. (Leave a comment)

%d bloggers like this: