Tukum Hakha Tho Ah Lai Laam Phunkip Hmuhsaknak Le Hlasaknak An Tuah Lai
Salai Cung Cung |2018 Tho 16| Hakha Chin Association for Christian Communication (CACC), Hakha (Chin) Literature and Culture Society (HLCS), Chin Youth Organization (CYO), Hakha Khuanu khuapa, Rual U le Chin Women Organization (CWO) tawlrelnak in Tho cu October 25 Carson Hall ah an tuah lai. Sathluak hlawrnak, Lai nunphung laam a phunphun hmuhsaknak le hlasaknak an tuah lai tiah kan theih.
“Hi ni Tho ah, Lai Sathluak kan hlawr lai, Hakha peng chung ummi tanghra awng (Distinction) he thiamhlei in a awng mi hna laksawng peknak a um lai. Biatawi chimnak ah Chin ramkulh Chief minister kan sawm lai, Hla le Music lei ah FiakfaiRock Band le Hakha khua chung um hlasak thiam mi kan sawm hna lai. Lai laam phunphun hmuhsaknak kan tuah lai, a caan cu 12 in thawk si lai. Tukum hi kum dang nakin ahlei in tuah kan timhmi cu um lo. HLCS hi a hun dirka te a si i tu zong hi caan a um lo mi karlak ah tet taktak in timhtuah mi a si. Nain zei a si zong ah tuah ko u si Lai nunphung hi Sunglawi tein tuah ko u sih kan ti caah kan timhtuah hi a si” tiah Hakha (Chin) Literature and Culture Society in Secretary Pastor Lai Cung nih The Chinland Post ah a chim.
“Tho hi ka ngakchiat lio ah an tuah hi ka thei bal lo, tuan pi ah khirhfa kan rak si tikah khirhfa phung le khirhfa zulh ning nih hin kan tho hi a thah ka ti ko lai cu. Cu hnu ah upa pawl khua an vun ruah le keimah ka theih tiang Tho an tuah cu Tedim pawl nih an tuah i Hakha ah mah lio cu Tedim pawl hi bawi an rak tam pah lio a si. Chin Oo Sii ah khin Zung nihnih an khar le Khuadoi puai an rak tuah. Kannih Hakha cu a rak um rih lo, cuti cun a vun ra i Falam ah ka um lio ah Falam nih sunglawi ngai in Fanger puai an tuah ve. Cun Hakha upa pawl nih Falam le Tedim zong nih an ngei ve ko kanmah Hakha zong Tho kan rak ngei bal ko an ti, cu ti cun Tho cu an rak thawk hi a si” tiah Hakha (Chin) Literature and Culture Society Chairman Pu Thla Kio Lian nih The Chinland Post ah a chim.
Tho program chungah aa tel dingmi cu Lai laam a phunphun, Hlasaknak, Sathluak, tanghra thiam hlei in a awngmi lak sawng peknak a um lai tiah kan thieh.
