Tukum Thawk In Kharpi Sianginn Khar Caan Thlakhat An Thumh Lai
Salai CungCung|2019 April 23| 2019-2020 cacawn kum thawk in a hrampi fimcawnnak sianginn pawl kharpi sianginn khar cu kumdang bantuk in thlathum khar si ti lo in thlahnih lawng khar a si cang lai tiah a hrampi fimcawnnak zung director U Ko Lay Win nih a chim.
Basic high School pawl cu 2018-2019 cacawn kum tiang February tiang lawng sianginn an kai nain a ra laimi June thawk cun 2019-2020 cacawn kum thawk in March thla tiang sianginn kai a si cang lai tiah kan theih.
“Kumdang ah cun February thla ah camipuai an phi i February dih in sianginn khar a si. Dik tak in cun Academic Year i cacawn caan cu tuan deuh pi in March 31 tiang a rak si. Cacawn caan hi thla 10 si ding kha tu cu thla 8 lawng an rak cawn. Cucaah tukum thawk in March dih tiang sianginn kai a si lai” tiah Ko Lay Win nih a chim.
High School pawl kumdongh camipuai cu 2019-2020 cacawn kum thawk in March thla dih lai ah kan tuah cang lai tiah fimcawnnak zung ramkomh minister Dr.Myo Thein Gyi nih April 21 ah a chim.
A hrampi sianginn pawl cu kumkhat ah voi 4 camipuai tuah a si lai i avoi 1nak camipuai cu July asilole August, avoi 2nak camipuai cu October, avoi 3nak camipuai cu December, avoi 4nak camipuai cu March thla dih lai ah tuah a si lai tiah fimcawnnak minister nih a chim.
A hrampi fimcawnnak sianginn pawl kumdongh camipuai cu March thla dih lai ah tuah ding a si caah taang 10 camipuai tuahnak kong zong aa thleng kho i zeitik a si te lai ti cu fimcawn zung lei nih an thanh than te lai.
“Tu minister chim ning ah cun ngakchia hi March thla chung sianginn kai ding ah a chim. Nu le pa nih fa le sianginn thlah hi thlakhat a hlei in caan an pek a hau. Khuacaan hi a linh tuk caah ngakchia pawl hi nilin lak ah an kai peng lai. Ngakchia sianginn ah lentecelh an duh sual ah cun an saya/sayamah te nih tha tein an zohkhenh a hau. Cun Ti lei harnak, dinti lei hi kumdang ah cun March thla ah khar a si cang caah harnak a um lo nain tu cu March dih tiang kai ding a si caah hi harnak pawl hi an theih a herh. Taang 4, Taang 8, Taang 10 cu zungzal in March thla ah camipuai phitmi chek peng a si caah sianginn kai zong ah poinak a um lo“ tiah U Aung Kyaw Tu nih a chim
Cun tu lio cachimh ning ah February thla dih ah sianginn khar ah cun cachimhnak lei ah zeihmanh harnak zong a um lo, ca cawn caan zong hi betchap a hau lo. Kharpi sianginn khar caan thlakhat thumh ding timi cu nu le pa, siangngakchia, saya/sayamah he aa pehtlaih caah zapi lungtlinnak a hal hmasa awk a si. Ramkip ni khua caan he aa tlak ning in kharpi sianginn khar caan hi kawlram nikhua caan he zohti in biachahnak an ngeih awk a si tiah a chim chap.
Khua caan a lin lio te ah kharpi sianginn khar caan an thumh ah cun siangngakchia, saya/sayamah hna ni linh fak tuk in an tuar lai caah kumdang bantuk in thlathum hi khar ah a tha ko tiah siangngakchia hringtu nu pakhat Daw Tin Tin Win nih a chim.
Ref: 7Day News
About The Author
