Tukum World Cup Champion Cotu Ding Le Sui Kedan Cotu Ding Sur Na Chep Ve Cang Maw?
City Hunter| 2018 July 1| Tukum Russia ah tuahmi World Cup champion cotu ding le Sui Kedan cotu ding ah ahodah na zumh? Khuacaan thanhtu nih an thanh ning bantuk in a si lo caan, a dik lo caan a um. Cu bantuk in pumpululh zong zumhning le ruahning bantuk in thil kal khawh a si bantuk in kal khawh lo zong a si ve. Cucaah, tukum World Cup ah champion cotu ding a tanglei bantuk in sur ka hun cheh. Nangtah na chep ve cang maw?
Portuguese football manager Jose Mourinho nihcun group stage an chuih lio ah tukum world cup semi final kai ding ah Group A in Portugal le Brazil, Group B in Germany le Argentina an kai lai. Hi phuli chung in Portugal le Argentina hi final an kai lai tiah a ruahdamhnak kong a rak chim. Argentina, Germany le Portugal cu an tla riangmang cang. Brazil hi zeidah an lawh te hnga? Amah chimmi maw a dik deuh hnga sur ka hun cheh ve hnik lai?
Atu round of 16 a chuihmi phu 16 hi phu 8, phu 8 in Group A le Group B in kan i fiannak ding ah hei then hmasa phut usih.
Group Ah Uruguay, Portugal, France, Argentina, Brazil, Mexico, Belgium le Japan an si. Uruguay, Portugal, France le Argentina in a thiam bikmi phu khat kha semi final a kai lai (Portugal le Argentina cu an tla cang I Uruguay le France an kai cang). Uruguay le France ah hin France an kai lai ti ka zumh. Cu bantuk in Brazil, Mexico, Belgium le Japan in a thiam bikmi phukhat kha semi final a kai ve lai. Mah phuli chung ah hin Belgium an kai lai ti ka zumh. Mah Group A phu 8 chung in a thiam bikmi phu 2 kha semi final an chuih lai i teinak hmutu kha final a kai lai.
Group A in France le Belgium hi semi final an kai lai ti ka zumh. Mah phu hnih ahhin Belgium hi final an kai lai tiah ka zumh deuh fawn. Nangtah, ahodah na zumh ve?
Cu bantuk in Group B in phu 8 cu; Spain, Russia, Croatia, Denmark, Sweden, Switzerland, Colombia le England an si. Spain, Russia, Croatia le Denmark in a thiam bikmi phukhat kha semi final a kai lai. Mah phu li chung ah hin Spain hi semi final an kai lai ti ka zumh. Cu bantuk in Sweden, Switzerland, Colombia le England in a thiam bikmi phu khat kha semi final a kai ve lai. Mah phuli chung ahhin England hi semi final an kai lai ti ka zumh. A thiam bik phu 2 kha semi final an kai lai i teinak hmutu kha final a kai lai.
Group B in Spain le England hi semi final an kai lai ti ka zumh. Mah phu hnih ahhin England hi final an kai ve lai tiah ka zumh deuh. Nangtah, ahodah na zumh ve?
Final/Champion Cotu
Final ah Belgium le England an chuih lai i England nih champion an co lai ti ka zumh. Pathumnak hi France le Spain an i cuh lai i Spain nih an co lai ti ka zumh. England final an kai lo sual ahcun a lingtalet in Spain nih champion an co khawh bantuk in Belgium zong nih an co khawh ve. Nangtah, tukum World Cup champion cotu ding ah ahodah na zumh bik?
Sui Kedan Cotu
Tukum World Cup (2018) ah Sui Kedan cu England (Harry Kane), Belgium (Romelu Lukaku)le Spain (Diego Costa)phu in pakhat chingchang nih an co lai. Hi phu thum lakah pakhat te lawng in ka thim ah cun champion cotu ding phu asiloah England in Harry Kane hi ka zumh bik.
Tutan tiangah goal tambik a ngeitu cu England in Harry Kane a si, goal 5 a ngei. A changtu cu Belgium in Lukaku le Portugal in C. Ronaldo hi goal 4 veve an ngei cang. Portugal cu an tlak cang caah C. Ronaldo caah ruahchannak a um ti lo, a dih cang.
Biakilh: Hi cabia cu The Chinland Post lungput le hmuhning a si lo, catialtu pumpak hmuhning a si.
