Tuluk Cozah Nih Hong Kong Ah Security Law A Nunter

Photo; The New York Times

TCP Online — Tuluk nih Hong Kong khuapi ah Security Law hman ding in nawl a chuah i cucu tuni (July 1) in a nung cang. Tuni July 1 hi British nih Hong Kong cu Tuluk sin a pek thannak kum 23 tlinnak ni a si.

Hong Kong ah duhlonak langhternak faktak in a um than i duhlonak langhtertu le palek pawl zong hlamihma a pumi tampi an um ti zong theih a si.

Tuluk nih Hong Kong ca i nawl (hramhram in) a chuahmi Security Law hna cu;

  1. Ithencheunak – Tuluk he ramkhat sinak ihrawm duhlo (secession)
  2. Tuluk cozah nawlngeihnak zeiah rel lo (subversion)
  3. Tlerhnak in zapi thin phawh/phang dingin tuahnak (terrorism)
  4. Thil tha lo tuahnak ah ramdang mi he tuahti

Hna hi an si. Hi a cunglei phung a buarmi cu thih hlan lo thong thlak khawh a si ti zong Security Law nih cun a langhter.

Mah phung pakhat cio nih sullam tampi an langhter, atulio Hong Kong buainak i duhlonak a langhtertu hna nih an tuah tawnmi; zapi hmanmi lam hrawh tibantuk le social media in Tuluk cozah thatlonak tialmi pawl cu a cunglei no.3 nak i (terrorism) ah aa tel hna.

Tuni Hong Kong i duhlonak langhternak ah minung pahnih (Tuluk cozah doh in catar aa putmi) an tlaih hna. An phung chuahthar ning a si ahcun mah  pahnih hna cu an nun chung thong thlak an si  lai.

Tuluk cozah nih Security Law a vengtu dingah tiin Hong Kong ah zung zong a hun cang lai i mah phung a buarmi paoh cu Hong Kong ah biaceih ti lo in Tuluk ram ah kuat in biaceih an si cang lai ti zong theih a si.

Joshua Wong (23) hi atu lio Hong Kong buainak ah siangngakchia hruaitu i a langsar bikmi pa a si. Amah nih 2016 kum lio ah mino pawl komh in Tuluk cozah dohtu bu pakhat– Demosisto tiin a rak ser. Mah a sermi  cu tuni ah a hrawh thannak kong thawng thanhnak a tuah. “Security Law a nun cang caah ahohmanh nih thaizing kong kan chim kho ti lo,” tiah a chim.

Cubantuk in minung tampi nih tuni ah anmah le an pumpak Twitter, Facebook account pawl tampi an hlonh hna. Media Organization hna zongah Hong Kong ramkhel kong a tialmi minung 100 leng nih an tial ciami vialte zong phiat ter than ding in an nawl hna.

Mahti Tuluk nih Hong Kong cung i phung thar a sermi cu atu lio Hong Kong ram i Tuluk cozah duhlonak langhtermi hna hrawh khawhnak bik ah a si tiin Hong Kong ramchung le vawleicung ram hna nih an langhter.

UK Prime Minister Boris Johnson nih Hong Kong minung ting 30 (three million) nih an duh ahcun kan ram ah rami sinak an van sok khawh tiah tuni ah thawng a thanh colh ve.

Hong Kong cu British (UK) nih 1842 kum in an rak pen hna i kum 150 leng a rak pennak khua a si. British nih 1997 lawng khan Tuluk sinah ap thanmi khua a si. Hiti a rak ap than lio ah hin British le Tuluk cozah nih biakamnak an ngeihmi a rak um. Cucu Hong Kong khuapi hi 2047 kum tiang;

  • A zalenmi khuapi a si lai, Tuluk he ram khat sinak aa hrawm lai nain uknak phung bel aa dang ve lai (one country, two systems)
  • Tuluk cozah nih ramleng vuanci le humhimnak lei vuanci dah ti lo Hong Kong kongah zeihmanh aa thlak lai lo

tiin (July 1, 1997) ah biakamnak an rak tuahmi hna a biapi cem mi cu an si. Kum 2047 tiang deih ding biakamnak cu tukum 2020 in cun kum 23 nak le tuhnu kum 27 a tang rih tinak a si. Nain, mah a tangmi kum 27 cu tuni i chuahtharmi Security Law nih cun zeihmanhlo ah a chuahter dawh a si cang.

Relchap;

Daih Lei Panh Loin A Zual Cuahmahmi Hong Kong Khuapi Buainak

Hong Kong Khuapi Buainak Nih Tuluk Le Hong Kong Khuahlum Kar Buainak A Chuahpi

Zeiruangahdah Hong Kong Minung Nih Tuluk Cozah An Zumh Khawh Hna Lo

Refs;

https://www.nytimes.com/2020/07/01/world/asia/hong-kong-security-law-china.htmlhttps://www.bbc.com/news/world-asia-china-52765838https://www.aljazeera.com/news/2020/06/china-passes-controversial-hong-kong-nat-security-law-reports-200630013307873.htmlhttps://www.bbc.com/news/uk-politics-53246899https://en.wikipedia.org/wiki/2019_Hong_Kong_extradition_billhttps://time.com/5707831/hong-kong-extradition-bill-withdrawal/

Na ruahning rak langhter ve.. (Leave a comment)

%d bloggers like this: