Tuluk Fidi Fan Bingbing Cu Ngunkhuai Hrial Ruang Ah Yuan Nuai 600 Tluk Dan An Tat
City Hunter| 2018 Tho 4| Minthang Tuluk fidi Fan Bingbing cu ngunkhuai a hrial ruang ah yuan 596 renglo (US$ 86.7) nuai dan an tat. Cu pin ah pek ding a simi a pek rih lomi ngunkhuai yuan 299 nuai zong pek than ding in nawl an chuahpiak tiah Tuluk cozah thanhca Xinhua nih October 3 ah a langhter.
Ngunkhuai zung nih dantatnak nawl an chuahmi cu September 30 ahkhan fidi Fan Bingbing kha an pek cang tiah Xinhua nih a thanh. A luancia June thla in khan zapi sin in a tlau i cu lio in baisakup lamthluan ah ngunkhuai hrialnak he pehtlai in chekhlatnak a tongmi hna lakah Fan Bingbing hi aa tel ve tiah thawngpang a leng.
Fidi Fan Bingbing nih dan an tatmi zapi yuan 884 nuai (US$ 129 nuai) cu rikhiahmi caan chung i a liamrulh ahcun mithah lainawnnak ahmuh ah chuahpi a si lai lo tiah theih a si. Fan Bingbing hi Tuluk ram ah lemcang tuan man a sang bikmi fidi pakhat a si.
Nihin ah Fan Bingbing nih amah Weibo account in “Ka ton bal lomi ngaihchiatnak ka tuar. Ka tuahsermi cung ah ka ningzak tuk. Hika hmun in zapi ngaihthiam kaan hal hna” tiah a tial. Fan Bingbing agent pakhat zong chekhlatnak tuah ding in palek phu nih an tlaih.
Kum 37 a simi Fan Bingbing cu Tuluk muicawl lawng si lo in Hollywood ah X-Men le Iron Man bantuk in muicawl tampi ah lemcang a tuan. Fan Bingbing hi Tuluk ram ah a minthang bikmi zungmawi thiamsang pakhat a si i nikum ah Forbes magazine nih tangka hmuh tha bikmi Tuluk zungmawi cazin ah a hmuhmi zapi hi American dollar 43 nuai (yuan 300 nuai) in a tambik a si tiah theih a si.
Ref: Duwun
About The Author
