Turkey, Syria lihninhnak ruang ah a thi mi 20,000 leng an phan
The Chinland Post | 2023 February 10 — Turkey le Syria ramri, January 30 ah a thazang ṭhawng tak mi li aa hninh caah a thi mi minung 20,000 leng an phan cang tiah theih a si. Bawmtu hna nih bawmhchanhnak thilri ṭha te um lo bu in a rawk mi le a cim mi inn karlak ah a nung rih mi pawl kha an kawl len lio hna tiah theih a si.
Turkey ram cozah i kokek thil ṭihnung a tawlreltu phu nih bawmtu minung sing 1 leng telh in, Heavy Equipment (စက်ကြီး) 5,500 hrawng bawmtu ah a thlah.
Turkey President Recep Tayyip Erdogan zong Turkey le Syria ramri, Gaziantep khua ah a phan i hi tluk a fak mi kokek thil ṭihnung caah timhtuahnak kan rak ngei lo nain ka rammi pawl a hohmanh kan kaltak hna lai lo tiah a chim.
Hatay peng ah, lihninhnak ruang ah a thi mi 3,300 leng an um. Turkey ram ah minung 17,000 leng an thih bantuk in hliam a tuar mi 63,000 an um Turkey cozah nih a chim. Syria lei ah a thi mi 3,100 an um tiah Syria cozah le bawmtu pawl nih an chim.
Atu an ton mi lihninhnak hi Japan ram 2011 i lihninhnak le Tsunami an tuar i minung 20,000 deng an thihnak thil sinning hnu ah vawlei cung minung a thi mi an tambik nak thil sinning a si.
Turkey President Erdogan nih rampi nih philhlonak ni 7 chung tuah ding le lihninhnak ruang ah peng 10 cu Emergency thla 3 a thanh.
