Tuzan In Thaizing Zanlei Tiang Ni Len Par Mawi Vote Pek Khawh A Si Than Cang

City Hunter| 2018 July 5| Myanmar Idol season 3 zuamnak i a thiam bik minung 7 (top 7) chung ah aa telmi Lainu Ni Len Par Mawi cu July 5 suimilam 11:00 in thaizing (July 6) zanlei suimilam 6:00 tiang vote peek khawh a si than cang. Nilen Par Mawi vote pek a duhmi paoh nih Myanmar Idol application download tuah in vote pek khawh a si bantuk in Ooredoo simcard hmang in 7777 ah 3 tiah tialpiak in vote pek khawh a si cang. A hlasakmi i palhnak a ngeih caah a hlei in vote peknak in chanhchuah a herh ngaingai tiah kan theih. 

July 5 zan Ni Len Par Mawi nih a sakmi hla cu L. Sai Zi nih a sakmi “Moe Yar Ti Htay” timi hla a si. Top 7 aa telmi hna cu; Ni Len @ Ni Len Par Mawi (voting number 3) Chan Myae Mg Cho (11), Zaw Gyi (9), Phyo Myat Aung (7), Nay Khat Min Thein (10), Mya Madi (6) le Ngwe Zin Hline (4) an si.

Myanmar Idol hi Ooredoo company nih sponsor a pekmi a si caah Ooredoo Simcard aa tlaihmi nih voikhat lawng si lo in duhzat paoh in vote pek khawh a si. Minung pakhat nih 7777 ah 3 tiah tialpiak in voi thongkhat tiang zong in rikhiah um lo in vote pek khawh a si. July 5 zan ah zuamnak an tuahmi cu July 6 zan ah result an thanh te lai. Vote a tlawm bikmi pakhat a tla ding a si caah a tlami chung i an i tel lonak ding ah mizapi vote peknak hi a biapi tuk tiah theih a si.

Hika ah July 5 zan zuamnak i hla an sakmi pawl ngaih than khawh a si. https://www.youtube.com/watch?v=U-8Jebh4ejw

Ni Len Par Mawi hringtu a pa Pu Hrang Vung nih, “Ramchung ramleng Chinmi zapi nih thlacamnak in siseh, vote peknak in siseh tha nan peknak thawng in nihin tiang kan fanu Ni Len Par Mawi cu top 7 tiang a phan kho cang. Top 6 chung i aa tel khawhnak ding ah mizapi vote peknak hi a biapi tuk hringhran. Chinmi nih vote nan pek cio nakthawng in Myanmar ram pumpi hla zuamnak Myanmar Idol winner tiang nan phakter khawh caah a dongh tiang thazaang nan kan chuahpi in nan kan tanpi rih naklai bawmhchanh kan herh ko” tiah The Chinland Post ah a chim.

Tukum Myanmar Idol winner laksawng cu ks. 50 million (sing 500) pek pin ah album chuahpiak a si lai. 2016 kum (season-1) ah Myanmar Idol cotu cu Saw lah Htaw Wah a si. 2017 kum season-2 ah Thar Nge a si.

Myanmar Idol zuamnak cu Cawn ni li zan lengmang tuah a si i Live in zuamnak an dih le cangka zan suimilam 11:00 in a thaizing cawn ninga zanlei suimilam 6:00 tiang mizapi nih vote pek khawh a si.

Mizapi nih thazaang kan pekmi hna vote ning cu Myanmar Idol application kha download tuah in vote khawh a si. Download kan tuahmi application pakhat in minung pathum tiang vote khawh a si.

Iphone a hmangmi caah  https://itunes.apple.com/us/app/mntv-myanmar-idol/id1400046900?mt=8

Android phone hmangmi caah  https://play.google.com/store/apps/details?id=com.myanmaridol.android&hl=en

Cun Ooredoo SIM Card in vote khawh a si. Oredoo SIM Card a hmangmi nih 7777 ah khan voting number na duhmi te khan a tial lai i na kuat lai. SIM Card pakhat in an duh zat paoh vote khawh a si. Ooredoo simcard hmang in Nilen Par Mawi vote pek na duh ahcun 7777 ah 3 tiah na tialpiak lai. Number 3 hi Nilen Par Mawi vote number a si.

Ni Len Par Mawi a tapa zong hi Nicolas Dawt Kam Sang zong Eain Meet Soneya Season-9 hlasak zuamnak ah pahnihnak a rak hmu balmi a si.

Ngaknu Nilen Par Mawi cu Engineering of Electronic Communication (EC) in Yangon ah sianginn a dih mi a si i Make Me Beautiful timi tamhmoih lei zuamnak zongah Myanmar Ram Pumpi huap in aa zuam i a thiambik pathum thimmi tiang aa telmi a si.

Amah hi kum 23 a si i Senthang peng Dongva khuami Pu Hrang Vung le Pi Thluai Iang @Thote nih an ngeihmi fanu hniang bik a si.

Nilen Par Mawi hi Eain Mat Sone Ya ah top 3 i a rak i telmi Nicholas Dawt Kam Sang far nu a si. Hi bantuk in fim cawnnak lei zongah sii-inn zungmawi thiamnak lei in siseh hlasaknak lei zong in siseh bochanmi a si i miphun dang hna lakah Chin miphun mithmai a kan ngeihtertu ngaknu pakhat a si. +++

Na ruahning rak langhter ve.. (Leave a comment)

%d bloggers like this: