TYA Cup Tlangthluan Pumpululh Chuihzuamnak Ah Vailam Tlang Nih Champion An Lak

0

TCP-Thantlang|2019 October 14| Avoi 7nak TYA Cup le Tlangthluan pumpululh chuihzumnak cu October 7 in 12 Lalluai certual ah tuah a si i Tlang 7 chungah Vailam tlang nih pakhatnak Champion an lak tiah theih a si.

Tutan tlangthluan (taung-caw) ah  Vailam, Bual, Lautu, Vanzang, Zophei, Zahnak le Khualhring lawng an i tel kho i Mara tlang lei tu cu relrem lonak an ngeih caah an lut kho lo. Tlang thluan pumpululh chuih zuamnak cu penguk zung hruainak in raktuah tawn a si cu chungah Vailam tlang cu kum saupi pakhatnak la ti lo in kum saupi  an um hnu ah a tutan TYA nih tuah mi ah pakhatnak an vun lak than hi a si. Pakhatnak laksawng cu Bual le Vailam an i cuh i Vailam nih 3-1 in an tei hna.

“Tutan TYA Cup tlangthluan pumpululh chuih zuamnak kan tuah mi chungah kan ruahnak leng in tlam a tling ngai. Cun Group an chuih lio bak in minung a zoh mi an khat dih colh, thuthnak zong a ting lo mi an tampi. A dihnak ni le bangcu a nuam taktak khi a si. Tuatan Cup kan tuahnak chungah Pumpak in tangka lei le a dangdang ah an kan bawmtu cung ah le tlang upa lei in hruaitu hna cungah kan lung aa lawm tuk.”tiah TYA hruaitu pakhat nih TCP ah a chim.

Tutan tlangthluan pumpululh chuih zuamnak chungah khua kingkap Hakha telh in khuate lei tiang nih an vun zoh hna. “Tlangthluan (taung-caw) pumpululh chuih zuamnak hi  Thantlang peng caah cun Worlh Cup tluk in kan i ngeih mi a si. An chim ningah khua khat hna cu an khuapi tein an rakzoh hna tiah an chim. A si kho mi zong a si. Cun Thantlang peng mino han hmailei ah zaanglek lei ah a thangcho dingmi mino tampi zong an um hna.” tiah TYA EC chungtel pakhat nih a  chim.

Avoi 7nak TYA Cup ahhin Lautu, Zophei, Bual, Vailam, Zanak, Vanzang le Khualhring tiah tlang (7) in chuih asi nain Zophei le Zanak cu puai chuih chung tlamtlinlonak ruangah an ingol than tiah theih a si.

Tutan ah tlang 7 ca (uniform) angki le bawngbi tuahnak caah Tinh Tinh Myanmar Group of Campanies nih a bawmh hna i, pakhatnak laksawng cu CHRO, pahnihnak laksawng Pu Van Biak Thang te chungkhar le Pathumnak laksawng MP Pu Van Thawng hna an hlut hna pin ah thiamhlei laksawng zong pumpak cio nih an hlut chih hna tiah theih a si. Tutan an laksawng cu pakhatnak sing 5 le Cup, pahnihnak sing 3 le pathumnak sing 2 an si. +++

 

About The Author

Na ruahning rak langhter ve.. (Leave a comment)

%d bloggers like this: