TYA Nih A Voihnihnak Tlangthluan Pumpululhchuih Zuamnak An Tuah Lai

Salai Elvis|2019 September 30| — Ara lai mi thla October 7 in 14 tiang Thantlang Youth Association (TYA) nih a voi hnihnak Thantlang peng tlangthluan (Taung-caw) pumpululh chuihzuamnak cu hlunghlai ngai in an tuah lai tiah kan theih.
“TYA Cup cu a tukum hin a voi 7nak kan tuah a si cang lai, a si nain Tlangthluan huap in pumpululhchuih zuamnak tu cu a tu tan hin a voi 2nak a si lai. Tutan cu phun dang deuh in zulhphung le dingrep zong a hlan kan in suai a si cang. Timhtuahnak a tha bik zong kan ngeih bantuk in tlangkip cio zong nih timhtuahnak tha ngai an ngei cio hna. Hmai lei ah Thantlang peng mino hi zalek lei le a lam kip in i pehtlai hna u sih ti saduh thahnak he tuah timh a si.”tiah TYA upa pakhat nih TCP ah a chim.

TYA Cup Fixtures 2019

Tutan TYA Cup tlangthluan (Taung-caw) pumpululh chuihzuamnak chungah zulhphung le dingrep phun 35 an suai i tlangkip hruaitu sin zongah pek dih an si. Tuatan TYA Cup chungah laksawng pakhatnak tangka sing 5 le Seal, pahnihnak sing 3 le Trophy, pathumnak sing 2 le trophy mah pin ah thiamhlei laksawng zong a um rih lai.
Tukum tlangthluan pumpululh chuihzuamnak chungah Vailam tlang, Zophei, Lautu, Khualhring, Bual, Zahnak le Vanzang tlang hna an i tel kho lai i Mara lei cu relrem lo nak an ngeih caah an i tel kho lai lo tiah theih a si. Tutan ah khuate um mi minung 8 nak tlawm lo zong cah i, i tel ding zong biachahnak ngeih a si.
Avoi khatnak tlangthluan (Taung-caw) pumpululh chuihzuamnak cu 2017 November thla ah rak tuah a si i cuchung ah pakhatnak Khualhring tlang, pahnihnak West Zophei le Pathumnak Vailam tlang hna nih an rak co.

Na ruahning rak langhter ve.. (Leave a comment)

%d bloggers like this: