TYA Nih Thantlang Khua Inn Kaang Bawmhnaknak Sing 5 Renglo An Pek

0

Salai Elvis| 2019 May 14| May 8 ah Thantlang khuachung zunghmun sangum Pu Ngun Bik te inn cu thilri zeihmanh chuah manh lo in a kangh caah Thantlang Youth Association (TYA) nih ngaihchiat pinak ah thilri le tangka fangin 400,000 cu May 13 ah bawmhnak an pek tiah kan theih.

TYA EC le chungtel hna nih siantawk cio thawh in a chuakmi sing 567,000 chungin thilri 167,000 man le tangkafang in 400,000 bawmhnak an pek hna hi a si.

“Inn kaangmi hna chung lawng si lo in Thantlang mino hna zong nih kan in ngaihchiatpi hna tinak ah kanmah EC chung le mino nih siantawk kut a samhtu hna minung 80 tluk sin in sing 5 renglo a chuak. Hi chungah thilri, rawlchumhnak bel, khengpi, ti chiahnak, hrai, tawng, baltin tibantuk thilri dangdang in 167,000 man tluk kan cawk, cun a  tangka in sing 4 kan pek chih hna. Kut a samhtu mino hna cung zong ah kan i lawm tuk” tiah TYA hruaitu pakhat nih TCP ah a chim.

Atu bantuk in May 8 lila ah Thantlang peng Hmunlipi khua zongah thilri zeihmanh chuahmanh lo in a kaang mi zong cozah uknak lei zung nih May 9 ah an khua ah kal in bawmhnak le Thantlang khuachung inn kang mi Pu Ngun Bik te  zong bawmhnak pek an si tiah kan theih.

2019 kum May thla chungah Thantlang peng in innli a kaang i hi chungah sunghzatlaknak an tonmi tangka in Ks. 1,700,000 an sung tiah Thantlang peng palek zung in theih a si.

About The Author

Na ruahning rak langhter ve.. (Leave a comment)

%d bloggers like this: