Thantlang Sianghleirun Chungkhar (TSC) le Thantlang Youths Association (TYA) I Bawm In Hakha, Falam Inn Kanghuhnak A Tong Mi Hna Caah Bawmhhalnak Tuah

Falam Mei Kang/YS Cung

Salai David Van|TCP-Hakha| 2021January14| Thantlang Sianghleirun Chungkhar (TSC) le Thantlang Youths Association (TYA) i bawm in January 13 ah Thantlang Khua chungah Hakha, Falam kanghuhnak a tongmi chungkhar hna bawmhnak caah tlawmsuk bawmhhalnak an tuah tiah theih a si.

Hi kong he pehtlai in TSC President Salai Dawt Cem Sang nih “Nizaan ah TSC le TYA i bawm in Thantlang khuachung ah Hakha, Falam kanghuhnak a tong mi chungkhar bawmhnak caah tiin tlawmsuknak kan tuah i Malaysia in 50000mmk kuat mi he a za tein sing 3,386,500MMK kan hmuh. Cun Belkheng le facang tlawmte zong kan hmuh chih. Nihin zong TSC Fb page ah bawmh khawh nak phone number pawl kan chiah I suimilam 5:00PM tiang bawmhnak pek khawh a si rih. 5:00pm hnu tu cun  kan hmuh mi dihlak cu vanchiatnak a tongmi hna sin ah kan kuat cang hna lai. Hakha a si ahcun HUSO sin in kan kuat lai, Falam tu cu Falam Mino Pawlkawm sin in kan kuat te lai tiah” TCP ah a chim.

“A tu bantuk in Hakha, Falam inn kanghnak a tong mi hna caah tlawmsuknak kan tuah nak a ruang hi Miphun ah Unau kan sinak le inn pa chaktlang kan sinak ruangah a si. Kanmah Thantlang zong vanchiat puicimhnak kan ton caan ah Falam tiang hna nih a kan zuanhnawh tawn” tiah TSC president nih  TCP ah a chim.

Na ruahning rak langhter ve.. (Leave a comment)

%d bloggers like this: